టెహ్రాన్: అమెరికా-ఇరాన్ మధ్య యుద్ధం మొదలై నెల రోజులు దాటింది. ఇరాన్ గగనతలంపై తమకు పూర్తి పట్టు ఉందని అమెరికా వరుసగా ప్రకటనలు చేస్తోంది. అయితే, గత 24 గంటల్లో జరిగిన ఘటనలు ఆ వాదనలను తలకిందులు చేశాయి. కేవలం ఒక్క రోజు వ్యవధిలోనే అమెరికాకు చెందిన రెండు యుద్ధ విమానాలు కూలిపోగా, రెండు ‘బ్లాక్ హాక్’ హెలికాప్టర్లు ఇరాన్ కాల్పుల బారిన పడ్డాయి. కువైట్‌లో జరిగిన డ్రోన్ దాడిలో ఒక ‘చినూక్’ హెలికాప్టర్ కూడా ధ్వంసమైంది. మార్చి 24న డొనాల్డ్ ట్రంప్ మాట్లాడుతూ.. “మా విమానాలు టెహ్రాన్ పైనే తిరుగుతున్నాయి, వారు ఏమీ చేయలేరు” అని ధీమా వ్యక్తం చేశారు. కానీ వారం తిరగకముందే పరిస్థితి పూర్తిగా మారిపోయింది.
ఇరాన్ వ్యూహం ఏమిటి? అత్యాధునిక అమెరికా విమానాలను ఇరాన్ ఎలా కూల్చగలుగుతోంది? దీనికి సమాధానం ఇరాన్ అనుసరిస్తున్న ‘అసిమెట్రిక్ వార్‌ఫేర్’ (అప్రత్యామ్నాయ యుద్ధం). అమెరికా ఊహించని పద్ధతుల్లో ఇరాన్ దాడులు చేస్తోంది. ముఖ్యంగా ‘మజీద్’ ఇన్‌ఫ్రారెడ్ ఎయిర్ డిఫెన్స్ సిస్టమ్ లేదా భుజంపై ఉంచుకుని కాల్చే క్షిపణులను ఇరాన్ వాడుతున్నట్లు నిపుణులు భావిస్తున్నారు. ఇవి రాడార్లకు దొరకవు కాబట్టి వీటిని గుర్తించడం చాలా కష్టం.
శుక్రవారం ఇరాన్ రివల్యూషనరీ గార్డ్స్ ఒక ప్రకటన చేస్తూ.. కొత్త రకపు అడ్వాన్స్డ్ ఎయిర్ డిఫెన్స్ సిస్టమ్ వాడి అమెరికాకు చెందిన ‘F-15E స్ట్రైక్ ఈగిల్’ను కూల్చేశామని ప్రకటించింది. కూలిన విమానం వద్దకు పైలట్లను రక్షించడానికి వెళ్లిన హెలికాప్టర్లపై కూడా ఇరాన్ దాడులు చేయడంతో పరిస్థితి మరింత గంభీరంగా మారింది.
గేమ్ ఛేంజర్‌గా మారిన ‘మజీద్ సిస్టమ్’: తక్కువ ఎత్తులో ఎగిరే విమానాలను లక్ష్యంగా చేసుకోవడానికి ఈ వ్యవస్థను రూపొందించారు. దీని ప్రత్యేకత ఏమిటంటే, ఇది రాడార్‌పై ఆధారపడదు. ఇది విమానం నుండి వచ్చే వేడిని (Infrared) పట్టుకుని దాడి చేస్తుంది. దీనివల్ల క్షిపణి వచ్చి తాకే వరకు పైలట్‌కు దాడుల సమాచారం తెలియదు.
నేల కింద దాగిన అసలు రహస్యం: ఇరాన్ ఇప్పుడు స్థిరమైన స్థావరాల కంటే మొబైల్ లాంచర్లు మరియు భూగర్భ సొరంగాలను ఎక్కువగా వాడుతోంది. వీటిని ‘మిస్సైల్ సిటీస్’ అని పిలుస్తారు. నిరంతరం దాడులు జరుగుతున్నా, ఇరాన్ వద్ద ఉన్న సగం క్షిపణి లాంచర్లు ఇంకా సురక్షితంగా ఉన్నాయని అమెరికా నిఘా వర్గాలు చెబుతున్నాయి. ఇవి ఒక చోట దాడి చేసి వెంటనే మరో చోటికి మారిపోతాయి (Hit and Run). దీనివల్ల వీటిని పట్టుకోవడం అమెరికాకు సవాలుగా మారింది.