దుబాయ్: హార్వర్డ్ విశ్వవిద్యాలయ ఆర్థికశాస్త్ర ప్రొఫెసర్ మరియు ఐఎంఎఫ్ మాజీ డిప్యూటీ మేనేజింగ్ డైరెక్టర్ గీతా గోపీనాథ్ తన ట్విట్టర్ (X) ఖాతాలో ఒక ముఖ్యమైన హెచ్చరికను జారీ చేశారు.
అమెరికాతో ‘కరెన్సీ స్వాప్ లైన్’ (Currency Swap Line) ఒప్పందంపై యూఏఈ (UAE) అధ్యయనం చేస్తోందని, ఇరాన్ వివాదం యొక్క అసలు ప్రభావం మార్కెట్లు ఊహించిన దానికంటే చాలా ఎక్కువగా ఉండబోతోందని ఆమె పేర్కొన్నారు. ఇటువంటి పరిణామాలను పెట్టుబడి మార్కెట్లలో సాధారణ విషయాలుగా పరిగణించలేమని ఆమె నొక్కి చెప్పారు.
కరెన్సీ స్వాప్ లైన్ అంటే ఏమిటి? కరెన్సీ స్వాప్ లైన్ అనేది రెండు దేశాల మధ్య కుదిరే అత్యవసర ఆర్థిక సహాయ ఒప్పందం. దీని ద్వారా ఒక దేశం (ఇక్కడ యూఏఈ) అవసరమైన సమయంలో అమెరికా డాలర్లను వేగంగా పొందవచ్చు. ప్రపంచ వాణిజ్యం, ముఖ్యంగా చమురు వ్యాపారం డాలర్ ఆధారితంగా జరుగుతుంది. సాధారణంగా ఆర్థిక సంక్షోభం ఏర్పడినప్పుడు డాలర్ కొరత, కరెన్సీ విలువ పతనం లేదా ద్రవ్య లభ్యత సమస్యలు తలెత్తకుండా అడ్డుకోవడానికి ఇటువంటి ఒప్పందాలు దోహదపడతాయి. 2008 ప్రపంచ ఆర్థిక సంక్షోభం మరియు 2020 కరోనా సమయంలో మాత్రమే ఇటువంటి ఒప్పందాలను భారీగా ఉపయోగించారు. మరి ఇప్పుడు యూఏఈ ఈ నిర్ణయం తీసుకోవడానికి కారణమేమిటి?
యూఏఈ హెచ్చరిక ఇస్తోందా? యూఏఈ ప్రపంచంలోని అత్యంత ధనిక దేశాలలో ఒకటి. దాని విదేశీ మారక నిల్వలు సుమారు 270 బిలియన్ డాలర్లు కాగా, ప్రభుత్వ నిధుల వద్ద 1.5 ట్రిలియన్ డాలర్లకు పైగా ఉన్నాయి. ఇంతటి సంపన్న దేశం అమెరికాను అత్యవసర డాలర్ సహాయం కోరడం సామాన్యమైన విషయం కాదు. ఇది రాబోయే భయంకరమైన ఆర్థిక పరిస్థితులను ముందుగానే ఊహించి తీసుకుంటున్న ముందస్తు చర్యగా భావిస్తున్నారు. ఇరాన్తో ఉద్రిక్తతలు పెరిగిన నేపథ్యంలో, హార్ముజ్ జలసంధి ద్వారా చమురు సరఫరా నిలిచిపోయే ప్రమాదం ఉంది. ఈ పరిస్థితుల్లో యూఏఈ డాలర్ల కోసం ఒప్పందం చేసుకుంటోంది అంటే, ఇరాన్ యుద్ధం మరింత ముదురుతుందా లేదా దీర్ఘకాలం కొనసాగుతుందా అనే ప్రశ్నలు తలెత్తుతున్నాయి.
గందరగోళంలో మార్కెట్లు: గీతా గోపీనాథ్ మాటల అర్థం ఏమిటంటే.. ప్రస్తుతం స్టాక్ మార్కెట్లు మరియు చమురు ధరల్లో కనిపిస్తున్న హెచ్చుతగ్గులు ఇరాన్ వివాదపు అసలు తీవ్రతను ఇంకా పూర్తిగా ప్రతిబింబించడం లేదు. మార్కెట్లు ప్రస్తుతానికి ప్రశాంతంగా కనిపిస్తున్నప్పటికీ, యూఏఈ వంటి దేశం తెరవెనుక అత్యవసర ఆర్థిక ఏర్పాట్లు చేస్తోందంటే.. అది డాలర్ కొరత, మూలధన తరలింపు మరియు భారీ ఆర్థిక కుదుపునకు సంకేతం.
గీతా గోపీనాథ్ హెచ్చరించినట్లుగా జరిగితే, రాబోయే కొన్ని రోజుల్లో లేదా వారాల్లో స్టాక్ మార్కెట్లు భారీ పతనాన్ని ఎదుర్కోవచ్చు. దీనికి సంబంధించిన తొలి సంకేతం హార్ముజ్ జలసంధి నుండే వచ్చే అవకాశం ఉంది. సాధారణ ప్రజలపై ఇది చమురు ధరల పెరుగుదల మరియు ద్రవ్యోల్బణం రూపంలో ప్రభావం చూపుతుందని ఆర్థిక నిపుణులు విశ్లేషిస్తున్నారు.