టెల్ అవీవ్: మధ్యప్రాచ్యంలో రోజురోజుకూ పరిస్థితులు విషమిస్తున్నాయి. ఈ నేపథ్యంలో మీడియాతో మాట్లాడిన ఇజ్రాయెల్ ప్రధాని బెన్జమిన్ నెతన్యాహు.. ఇరాన్ క్రమంగా నాశనం చేయబడుతోందని సంచలన వ్యాఖ్యలు చేశారు. ప్రస్తుతం క్షిపణి దాడులు జరుగుతున్నాయని, అవసరమైతే నేరుగా సైన్యాన్ని రంగంలోకి దించడానికి (గ్రౌండ్ ఇన్వేషన్) కూడా తాము సిద్ధంగా ఉన్నామని స్పష్టం చేశారు.
ఇజ్రాయెల్ – ఇరాన్ మధ్య యుద్ధం ప్రారంభమై దాదాపు 4వ వారంలోకి ప్రవేశించింది. ప్రస్తుతానికి యుద్ధం ముగిసే సూచనలేవీ కనిపించడం లేదు. ఈ క్రమంలో నెతన్యాహు కొన్ని కీలక విషయాలను వెల్లడించారు.
పూర్తిగా నాశనం చేస్తాం
అణు ఆయుధాల తయారీకి అవసరమైన యురేనియంను శుద్ధి చేసే సామర్థ్యాన్ని, బాలిస్టిక్ క్షిపణులను తయారు చేసే శక్తిని ఇరాన్ కోల్పోయిందని నెతన్యాహు తెలిపారు. ఇజ్రాయెల్ జరిపిన దాడుల వల్ల ఇరాన్ సైనిక సామర్థ్యం గణనీయంగా బలహీనపడిందని ఆయన అన్నారు. “మేము విజయం సాధిస్తున్నాము, ఇరాన్ నాశనమవుతోంది. అణు ఆయుధాలు, క్షిపణుల తయారీకి అవసరమైన ముడి పదార్థాలను ఉత్పత్తి చేసే కర్మాగారాలనే మేము లక్ష్యంగా చేసుకున్నాము. ఇరాన్ క్షిపణి మరియు డ్రోన్ గిడ్డంగులు ఇప్పటికే చాలా వరకు ధ్వంసమయ్యాయి.. త్వరలోనే అవి పూర్తిగా తుడిచిపెట్టుకుపోతాయి” అని ఆయన పేర్కొన్నారు. అయితే, ఇరాన్ యురేనియం శుద్ధి సామర్థ్యాన్ని కోల్పోయిందన్న మాటలకు ఆయన ఎలాంటి ఆధారాలు చూపలేదు.
అమెరికా ప్రమేయంపై వివరణ
ఈ యుద్ధంలోకి అమెరికాను ఇజ్రాయెల్ బలవంతంగా లాగిందన్న ఆరోపణలను నెతన్యాహు తోసిపుచ్చారు. “అధ్యక్షుడు డొనాల్డ్ ట్రంప్‌కు ఏం చేయాలో ఎవరైనా చెప్పగలరా? అమెరికా ప్రయోజనాలకు ఏది మంచిదో ట్రంప్ అదే చేస్తున్నారు. అమెరికా, ఇజ్రాయెల్ దళాలు సమన్వయంతో, నిఘా వర్గాల సాయంతో మెరుపు వేగంతో లక్ష్యాలను ఛేదిస్తున్నాయి. కాబట్టి మేము అమెరికాను యుద్ధంలోకి లాగామని చెప్పడం హాస్యాస్పదం” అని ఆయన అన్నారు.
మరణ వార్తలపై స్పందన
కొద్దిరోజుల క్రితం నెతన్యాహు మరణించారనే పుకార్లు వ్యాపించాయి. వాటికి సమాధానమిస్తూ.. “ముందుగా, నేను సజీవంగా ఉన్నానని చెప్పాలనుకుంటున్నాను” అని తన ప్రసంగాన్ని ప్రారంభించారు. తాము కేవలం ఇజ్రాయెల్‌ను మాత్రమే కాదు, మొత్తం మధ్యప్రాచ్యాన్ని మరియు ప్రపంచాన్ని రక్షిస్తున్నామని చెప్పారు. ఇరాన్ విషయంలో తాను, డొనాల్డ్ ట్రంప్ ఒకే అభిప్రాయంతో ఉన్నామని తెలిపారు. ట్రంప్ అభ్యర్థన మేరకు ఇరాన్‌లోని ప్రధాన గ్యాస్ క్షేత్రాలపై దాడులను ప్రస్తుతానికి వాయిదా వేస్తున్నట్లు నెతన్యాహు ప్రకటించారు.
ఇరాన్ నాయకత్వంలో విభేదాలు
ఇరాన్ అగ్ర నాయకత్వంలో చీలికలు వస్తున్నట్లు సంకేతాలు కనిపిస్తున్నాయని నెతన్యాహు అన్నారు. “ఇరాన్‌ను ఓడించడానికి ఏం చేయాలో అది చేస్తాం. ఇప్పటివరకు వాయుమార్గంలోనే దాడులు జరిగాయి, అవసరమైతే నేరుగా సైన్యాన్ని పంపి భూతల దాడులు కూడా చేస్తాం. ప్రస్తుతం ఇరాన్‌ను ఎవరు పరిపాలిస్తున్నారో కూడా తెలియని పరిస్థితి నెలకొంది. అక్కడ ఉన్నతాధికారుల మధ్య తీవ్ర ఉద్రిక్తత ఉంది. ఇది తిరుగుబాటుకు దారితీస్తుందా అనేది ఇప్పుడే చెప్పలేం, వేచి చూడాలి” అని ఆయన వ్యాఖ్యానించారు.