అమెరికా దాడిలో ఇరాన్ యుద్ధనౌక ధ్వంసం: ఇరాన్ మరియు అమెరికా మధ్య మొదలైన మహా యుద్ధం ఇప్పుడు సముద్ర గర్భం వరకు చేరుకుంది. ఆదివారం జరిపిన భారీ సైనిక చర్యలో, ఒమన్ గల్ఫ్‌లో ఇరాన్‌కు చెందిన ఒక శక్తివంతమైన యుద్ధనౌకను ముంచేసినట్లు అమెరికా సైన్యం ధృవీకరించింది.
ఈ భీకర దాడితో పాటు, అమెరికన్ సెంట్రల్ కమాండ్ (CENTCOM) ఇరాన్ సాయుధ దళాలు, రివల్యూషనరీ గార్డ్స్ (IRGC) మరియు పోలీసులకు ఒక కఠినమైన హెచ్చరిక జారీ చేసింది. తక్షణమే ఆయుధాలను వదిలివేసి, తమ స్థావరాలను ఖాళీ చేయాలని అల్టిమేటం ఇచ్చింది.
చాబహార్ ఓడరేవుపై అమెరికా వైమానిక దాడి
ప్రస్తుతం ఇరాన్‌పై దాడులను పర్యవేక్షిస్తున్న అమెరికా సెంట్రల్ కమాండ్ అధికారిక ప్రకటన విడుదల చేసింది. ‘ఒమన్ గల్ఫ్’ లోని చాబహార్ ఓడరేవులో మోహరించిన ఇరాన్ యొక్క ‘జమ్రాన్-క్లాస్ కార్వెట్’ (Jamaran-class corvette) యుద్ధనౌకను లక్ష్యంగా చేసుకున్నట్లు తెలిపింది. అమెరికా క్షిపణుల ఖచ్చితమైన దాడికి ఆ యుద్ధనౌక సముద్రంలో మునిగిపోయింది. జమ్రాన్ క్లాస్ నౌకలు ఇరాన్ నావికాదళానికి వెన్నెముక వంటివి, ఇది మునిగిపోవడం టెహ్రాన్‌కు తీరని వ్యూహాత్మక నష్టం.
ట్రంప్ కఠిన సందేశం
ఈ దాడి జరిగిన వెంటనే, సెంట్రల్ కమాండ్ సోషల్ మీడియా వేదిక ‘X’ లో అధ్యక్షుడు డొనాల్డ్ ట్రంప్ శనివారం నాటి ప్రసంగాన్ని ప్రస్తావిస్తూ ఇరాన్ సైనికులను హెచ్చరించింది. “అధ్యక్షుడు చెప్పినట్లుగా, ఇరాన్ సాయుధ దళాలు, IRGC మరియు పోలీసు సభ్యులు తమ ఆయుధాలను పక్కన పెట్టాలి. మీ నౌకను వదిలివేయండి (Abandon ship)” అని స్పష్టంగా పేర్కొంది. అమెరికా ఇప్పుడు కేవలం సైనిక స్థావరాలను ధ్వంసం చేయడమే కాకుండా, ఇరాన్ భద్రతా వ్యవస్థను పూర్తిగా నిర్వీర్యం చేసి అధికార మార్పిడి దిశగా సాగుతోందని ఈ పరిణామాలు సూచిస్తున్నాయి.
ఇరాన్ వర్గాల్లో కలకలం
వ్యూహాత్మకంగా కీలకమైన చాబహార్ ఓడరేవుపై దాడి ఇరాన్ సముద్ర భద్రతను అతలాకుతలం చేసింది. సుప్రీం లీడర్ మరణం (అవాస్తవ ప్రచారం) మరియు ఇప్పుడు నావికాదళం దెబ్బతినడంతో ఇరాన్ సైన్యంలో భయాందోళనలు నెలకొన్నాయని నిపుణులు భావిస్తున్నారు. ఎవరైతే ప్రతిఘటనను వదిలిపెడతారో వారిని వదిలేస్తామని, లేనిపక్షంలో ఈ ‘ఆపరేషన్’ మరింత ఘోరంగా ఉంటుందని అమెరికా స్పష్టం చేసింది.