“ఇలాంటి వాటికి కూడానా.. నల్లగా ఉన్నావన్నారని విడాకులా?”.. శరీర ఆకృతిపై వెక్కిరింపుల వివాదం.. భర్త పిటిషన్‌పై హైకోర్టు సంచలన తీర్పు..!!

ఛత్తీస్‌గఢ్ హైకోర్టులో దాఖలైన ఓ విడాకుల కేసులో న్యాయస్థానం అత్యంత కీలకమైన తీర్పును వెలువరించింది.

తన భార్య తనను ‘నల్లగా, లావుగా’ ఉన్నానంటూ నిరంతరం అవమానిస్తోందని, అందువల్ల తనకు విడాకులు మంజూరు చేయాలని కోరుతూ ఓ భర్త దాఖలు చేసిన పిటిషన్‌ను కోర్టు కొట్టివేసింది. భార్యపై భర్త మోపిన ఇలాంటి ఆరోపణలు మాత్రమే విడాకులు పొందడానికి తగిన చట్టపరమైన, బలమైన ఆధారాలు కావని న్యాయస్థానం స్పష్టం చేసింది.

న్యాయమూర్తుల ధర్మాసనం విచారించిన ఈ కేసులో, వైవాహిక జీవితంలో జరిగే గొడవలను, వేధింపులను నిరూపించడానికి అవసరమైన సరైన ఆధారాలను కోర్టుకు సమర్పించడంలో భర్త విఫలమయ్యాడని పేర్కొంది. అంతేకాకుండా, సుప్రీంకోర్టు గత మార్గదర్శకాలను ప్రస్తావించిన న్యాయమూర్తులు, భార్య క్రూరంగా ప్రవర్తించిందనడానికి ఎలాంటి ప్రత్యక్ష ఆధారాలు లేనందున కింది కోర్టు ఇచ్చిన ఉత్తర్వులే సరైనవని తేల్చిచెప్పారు.

ఈ క్రమంలో భర్త తరఫున దాఖలు చేసిన అప్పీల్ పిటిషన్‌ను పూర్తిగా కొట్టివేయడంతో పాటు, భార్యకు చెందిన వస్తువులను తిరిగి ఇచ్చేయాలన్న గత ఆదేశాలను కూడా కోర్టు సమర్థించింది. భార్యాభర్తల మధ్య శరీర ఆకృతి వివాదం, కుటుంబ కలహాలకు సంబంధించిన ఈ సంచలన తీర్పు ప్రస్తుతం సోషల్ మీడియాలో హాట్ టాపిక్‌గా మారి వైరల్ అవుతోంది.