ఇళ్లల్లో పనిచేసే మహిళ మొదటి విదేశీ ప్రయాణం..! “భాష తెలియదు”.. అయినా ఆహారంతో కుదిరిన స్నేహం.. వేరే లెవెల్ అంతే!

ఇళ్లల్లో పనులు చేసుకునే రేష్మా అనే మహిళ, ప్రముఖ కంటెంట్ క్రియేటర్ (Content Creator) అనీష్ భగత్ మద్దతుతో జీవితంలో మొదటిసారిగా విదేశీ ప్రయాణం చేసి థాయిలాండ్ చేరుకున్నారు.

ఒకవైపు తన మొదటి అంతర్జాతీయ ప్రయాణం అనే ఉత్సాహం ఉన్నప్పటికీ.. మరోవైపు అలవాటు లేని కొత్త దేశానికి ఒంటరిగా వెళ్లడంపై ఆమె మనసులో ఎన్నో భయాలు, మరెన్నో ప్రశ్నలు తలెత్తాయి. గతంలో ఎన్నడూ ఇంట్లోని పురుషుల తోడు లేకుండా కనీసం బయటకు కూడా వెళ్లని రేష్మాకు, ఈ విదేశీ ప్రయాణం అనేది ఒక ఊహించని సరికొత్త అనుభవం.

ఆ సమయంలో తనకు అక్కడి భాష తెలియకపోయినా.. ‘ఆహారం’ అనేది మనుషులను సులభంగా కలుపుతుందనే నమ్మకంతో, రేష్మా ఇంటి వద్దే మన సాంప్రదాయక వంటకం ‘పూరన్ పోలి’ (బొబ్బట్లు/భక్ష్యాలు) స్వయంగా వండి తనతో పాటు తీసుకువెళ్లారు. బ్యాంకాక్ నగర వీధుల్లో తిరుగుతున్నప్పుడు, అక్కడ కలిసిన ఒక విదేశీ పర్యాటక (ఫారెన్ టూరిస్ట్) మహిళకు ఆమె ప్రేమతో ఈ పూరన్ పోలిని తినిపించారు. అలా కేవలం రుచికరమైన వంటకంతో మొదలైన ఆ పరిచయం.. ఆ కొత్త దేశంలో ఆమెకు మొదటి స్నేహాన్ని తెచ్చిపెట్టింది.

చీరకట్టుతో బ్యాంకాక్ వీధుల్లో రేష్మా తన మొదటి ట్రావెల్ వ్లాగ్ (Vlog) వీడియోను రికార్డ్ చేస్తున్నప్పుడు, అక్కడ ఒక స్థానిక సోషల్ మీడియా ఇన్‌ఫ్లుయెన్సర్‌ను కూడా కలిశారు. ఆమెతో కాసేపు ముచ్చటించి, ఇద్దరూ కలిసి మధ్యాహ్న భోజనం చేసి ఆనందించారు. కుటుంబ బాధ్యతల మధ్య మహిళలు సాధారణంగా తమ కోసం సమయాన్ని కేటాయించుకోవడం మర్చిపోతుంటారని.. కానీ ఈ ప్రయాణం తనను తాను మరింత బాగా అర్థం చేసుకోవడానికి ఒక గొప్ప అవకాశంగా నిలిచిందని రేష్మా సంతోషం వ్యక్తం చేశారు.

రోజంతా కొత్త ప్రదేశాలను చుట్టేసి, వింత అనుభవాలను సొంతం చేసుకున్న తర్వాత.. “రేష్మా, నిన్ను చూస్తే నాకు చాలా గర్వంగా ఉంది” అని ఆమె అద్దంలో చూసుకుంటూ తనకు తానే చెప్పుకున్న మాటలు ప్రస్తుతం లక్షలాది మంది నెటిజన్ల హృదయాలను కదిలిస్తున్నాయి. రేష్మా మనసులోని భయం, దానిని ఆమె అధిగమించిన తీరు మరియు ఆమె ముఖంలో కనిపించిన ఆనందం తమపై ఎంతగానో ప్రభావం చూపాయని కొనియాడుతూ.. నెటిజన్లు ఈ వీడియోను సోషల్ మీడియాలో తెగ షేర్ చేస్తున్నారు.