డిసెంబర్ 20, 2025న ఉదయ్‌పూర్‌లోని ఒక హోటల్‌లో జీకేఎం ఐటీ (GKM IT) ప్రైవేట్ లిమిటెడ్ సీఈవో జితేష్ సిసోడియా పుట్టినరోజు వేడుకలు జరిగాయి. ఈ పార్టీలో మద్యం ఏరులై పారింది. అదే కంపెనీలో మేనేజర్‌గా పనిచేస్తున్న బాధితురాలు రాత్రి 9 గంటలకు పార్టీకి చేరుకుంది. అయితే రాత్రి 1:30 గంటలకు పార్టీ ముగిసే సమయానికి ఆమె ఆరోగ్యం క్షీణించింది.
కుట్ర మరియు కిడ్నాప్: బాధితురాలు ఇంటికి వెళ్లాలనుకున్నప్పుడు, కంపెనీ ఎగ్జిక్యూటివ్ హెడ్ శిల్పా సిరోహి ఆమెను మరో “ఆఫ్టర్-పార్టీ”కి రమ్మని బలవంతం చేసింది. నమ్మకంతో బాధితురాలు కారు ఎక్కింది. ఆ కారులో అప్పటికే సీఈవో జితేష్, శిల్ప భర్త గౌరవ్ సిరోహి ఉన్నారు. దారిలో ఆమెకు బలవంతంగా డ్రగ్స్ కలిపిన సిగరెట్ ఇచ్చారు, దానివల్ల ఆమె స్పృహ కోల్పోయింది.
కదులుతున్న కారులో గ్యాంగ్ రేప్: స్పృహలో లేని బాధితురాలిపై సీఈవో జితేష్, గౌరవ్ మరియు శిల్ప ముగ్గురూ కలిసి అత్యాచారానికి పాల్పడ్డారు. ఈ దారుణం తెల్లవారుజామున 1:45 నుండి 5:00 గంటల వరకు కదులుతున్న కారులోనే సాగింది. బాధితురాలు ప్రతిఘటించడానికి ప్రయత్నించినప్పుడల్లా ఆమె గొంతు నులిమి చంపడానికి ప్రయత్నించారు. ఉదయం ఆమెను ఇంటి దగ్గర వదిలేసి వెళ్ళిపోయారు.
డ్యాష్‌క్యామ్ (Dashcam) – కీలక సాక్ష్యం: తెల్లవారుజామున స్పృహలోకి వచ్చిన బాధితురాలు తన శరీర పరిస్థితిని చూసి దిగ్భ్రాంతికి గురైంది. తన చెవి రింగులు, మేజోళ్లు, లోదుస్తులు మాయమవ్వడం గమనించింది. అయితే, కారులో ఉన్న డ్యాష్‌క్యామ్ రికార్డింగ్ ఆడియో మరియు వీడియోలను ఆమె తెలివిగా సేకరించగలిగింది. అందులో నిందితుల సంభాషణలు, ఆమె అరుపులు స్పష్టంగా రికార్డ్ అయ్యాయి. ఇది ఈ కేసులో అతిపెద్ద ఆధారంగా మారింది.
నిందితుల అరెస్ట్: ఘటన జరిగిన మూడు రోజుల తర్వాత డిసెంబర్ 23న బాధితురాలు ఫిర్యాదు చేయగా, పోలీసులు డిసెంబర్ 25న సీఈవో జితేష్ సిసోడియా, గౌరవ్ మరియు శిల్పాలను అరెస్ట్ చేశారు. ప్రస్తుతం వారు పోలీస్ రిమాండ్‌లో ఉన్నారు.