చిక్కబళ్లాపుర తాలూకాలోని హొన్నేనహళ్లిలో అనుమానాస్పద స్థితిలో ఓ నవవధువు మృతి చెందింది. మృతురాలిని రూపా (30)గా గుర్తించారు. ఆమె తన నివాసంలో ఉరివేసుకున్న స్థితిలో శవమై కనిపించింది. కేవలం ఐదు నెలల క్రితమే దొడ్డబళ్లాపుర తాలూకా బాశెట్టిహళ్లికి చెందిన రూపకు, మునిరాజుతో వివాహం జరిగింది.
భర్త అనుమానమే శాపమైందా? భర్తకు ఉన్న అనుమానపు ప్రవృత్తి కారణంగానే రూపా ఆత్మహత్య చేసుకుని ఉండవచ్చని అనుమానిస్తున్నారు. ప్రస్తుతం మృతదేహాన్ని చిక్కబళ్లాపుర జిల్లా ఆసుపత్రి మార్చురీకి తరలించారు.
భర్తపైనే హత్య ఆరోపణలు: కూతురి మరణంతో దిగ్భ్రాంతికి గురైన రూప కుటుంబ సభ్యులు, ఆమె భర్త మునిరాజుపై తీవ్ర ఆరోపణలు చేస్తున్నారు. ఇది ఆత్మహత్య కాదని, అతడే హత్య చేశాడని వారు వాదిస్తున్నారు. ఆసుపత్రి మార్చురీ వద్ద మునిరాజు తల్లిని చూసి రూప బంధువులు ఆగ్రహంతో శాపనార్థాలు పెట్టారు. చిక్కబళ్లాపుర రూరల్ పోలీస్ స్టేషన్ పరిధిలో ఈ ఘటన జరిగింది. ఇది ఆత్మహత్యనా లేక కుటుంబ సభ్యులు ఆరోపిస్తున్నట్లు హత్యనా అనేది పోలీసుల దర్యాప్తులో తేలాల్సి ఉంది.