దక్షిణ అమెరికా దేశమైన పెరూలోని ఆండీస్ పర్వత ప్రాంతంలో, సముద్ర మట్టానికి 4,800 మీటర్ల కంటే ఎక్కువ ఎత్తులో శాస్త్రవేత్తలు ఒక కొత్త జాతి బల్లిని కనుగొన్నారు.
తీవ్రమైన చలి, తక్కువ ఆక్సిజన్ ఉండే ఈ పర్వత ప్రాంతంలో కనుగొన్న ఈ బల్లికి ‘లియోలేమస్ ఆర్కిపెన్సిస్’ (Liolaemus archipensis) అని పేరు పెట్టారు.
ఈ కొత్త రకం బల్లి 6 నుంచి 8 సెంటీమీటర్ల వరకు మాత్రమే పెరిగే అతి చిన్న శరీరాన్ని కలిగి ఉంటుంది. వీటిలో మగ మరియు ఆడ బల్లుల శరీరాలపై ఉండే మచ్చల్లో వ్యత్యాసాలు కనిపిస్తాయి. ఆడ బల్లి వీపుపై చతురస్రాకారపు మచ్చలు ఉండగా, మగ బల్లి వీపుపై వాలుగా ఉండే మచ్చలతో పాటు తెల్లని పొలుసులు ఉంటాయి.
ఈ పొలుసులు, రాళ్ల మధ్య మగ బల్లులు తమను తాము దాచుకోవడానికి (క్యామోఫ్లేజ్ చేసుకోవడానికి) సహాయపడతాయి. ఈ బల్లులు మొక్కలను ఆహారంగా తీసుకోవడమే కాకుండా సాలెపురుగులు, బీటిల్స్ (పెంకుపురుగులు) మరియు చిన్న కీటకాల లార్వాలను కూడా వేటాడి తినే స్వభావాన్ని కలిగి ఉంటాయి.
పెరూ దేశానికి చెందిన జీవశాస్త్రవేత్త లింగ్ హువామానీ-వాల్డెర్రామా నేతృత్వంలోని పరిశోధక బృందం ఈ పరిశోధనను చేపట్టింది. ఈ కొత్త ఆవిష్కరణతో పెరూ దేశంలో ఇప్పటివరకు గుర్తించిన బల్లి జాతుల సంఖ్య 296కు చేరుకుందని పరిశోధకులు తెలిపారు.
స్విట్జర్లాండ్‌కు చెందిన ‘డైవర్సిటీ’ (Diversity) సైన్స్ జర్నల్‌లో ప్రచురితమైన ఈ అధ్యయనం, అత్యంత కఠినమైన వాతావరణ పరిస్థితులలో కూడా జీవులు తమను తాము ఎలా అనుకూలపరచుకుని (అడాప్ట్ చేసుకుని) జీవిస్తాయో అర్థం చేసుకోవడానికి ఎంతగానో సహాయపడుతుందని నిపుణులు భావిస్తున్నారు.
Leave a Reply