సుభాష్ చంద్రబోస్కు సంబంధించి దాఖలైన ఒక ప్రజా ప్రయోజన వ్యాజ్యం (PIL) విచారణ సందర్భంగా సుప్రీంకోర్టు న్యాయమూర్తి జస్టిస్ సూర్యకాంత్ అత్యంత కఠినమైన వ్యాఖ్యలు చేశారు. “ఇలాంటి పిటిషన్లు దాఖలు చేస్తే కోర్టులోకి మీ ప్రవేశాన్ని నిషేధిస్తాం” అని పిటిషనర్ను కోర్టు హెచ్చరించింది. ఈ పిటిషన్ను కొట్టివేయడమే కాకుండా, ఇది న్యాయ ప్రక్రియను దుర్వినియోగం చేయడమేనని కోర్టు అభిప్రాయపడింది.
ఈ పిటిషన్లో ప్రధానంగా నేతాజీని అధికారికంగా ‘నేషనల్ సన్’ (దేశ పుత్రుడు) గా ప్రకటించాలని డిమాండ్ చేశారు. దీనితో పాటు జనవరి 23న ఆయన జయంతిని మరియు ఆజాద్ హింద్ ఫౌజ్ స్థాపక దినోత్సవాన్ని జాతీయ దినోత్సవాలుగా ప్రకటించాలని, కటక్లోని ఆయన జన్మస్థలాన్ని జాతీయ మ్యూజియంగా మార్చాలని కోరారు.
ఈ కేసును జస్టిస్ సూర్యకాంత్ మరియు జస్టిస్ జాయ్మాల్య బాగ్చీలతో కూడిన ధర్మాసనం విచారించింది. విచారణలో భాగంగా, పిటిషనర్ పినాకపాణి మొహంతి గతంలో కూడా ఇటువంటి పిటిషనే దాఖలు చేశారని, దానిని జనవరి 5, 2024న కోర్టు ఇప్పటికే కొట్టివేసిందని ధర్మాసనం గుర్తించింది.
ఒకే అంశాన్ని పదే పదే లేవనెత్తడం కోర్టు సమయాన్ని వృథా చేయడమేనని, ఇది కేవలం ప్రాచుర్యం (Popularity) కోసం చేస్తున్న ప్రయత్నంలా కనిపిస్తోందని కోర్టు ఆగ్రహం వ్యక్తం చేసింది. జస్టిస్ సూర్యకాంత్ కఠినంగా స్పందిస్తూ.. భవిష్యత్తులో ఈ పిటిషనర్ దాఖలు చేసే ఎలాంటి కొత్త ప్రజా ప్రయోజన వ్యాజ్యాలను విచారణకు స్వీకరించవద్దని రిజిస్ట్రీని ఆదేశించారు. అనవసరమైన మరియు పదే పదే వేసే పిటిషన్లపై కోర్టు కఠినంగా ఉంటుందనే సంకేతాన్ని ఈ తీర్పు ఇచ్చింది.