మధ్యప్రదేశ్ రాష్ట్రంలోని షాహ్‌డోల్ లోక్‌సభ నియోజకవర్గానికి చెందిన బీజేపీ ఎంపీ హిమాద్రి సింగ్, ఆమె భర్త నరేంద్ర సింగ్ మరావిల 9 ఏళ్ల వైవాహిక బంధం ముగిసింది.
గత కొన్నేళ్లుగా వీరిద్దరూ వేర్వేరుగా నివసిస్తుండగా, తాజాగా న్యాయస్థానం వీరికి విడాకులు మంజూరు చేసింది. 2017 నవంబర్ 23న అనూప్‌పూర్‌లో వీరి వివాహం జరిగింది. వీరికి ఒక కుమార్తె ఉండగా, ప్రస్తుతం ఆమె హిమాద్రి సింగ్‌తోనే ఉంటోంది.
ఈ వివాహం వెనుక ఒక ఆసక్తికరమైన రాజకీయ నేపథ్యం కూడా ఉంది. 2009 లోక్‌సభ ఎన్నికల్లో హిమాద్రి సింగ్ తల్లి రాజేష్ నందిని సింగ్‌పై నరేంద్ర సింగ్ మరావి పోటీ చేసి ఓడిపోయారు. ఆ తర్వాత కొన్నేళ్లకు, అదే రాజకీయ కుటుంబానికి చెందిన హిమాద్రి సింగ్‌ను ఆయన వివాహం చేసుకున్నారు.
వివాహం తర్వాత హిమాద్రి సింగ్ రాజకీయ ప్రస్థానం ఊపందుకుంది. 2016లో కాంగ్రెస్ తరపున లోక్‌సభ ఉపఎన్నికలో పోటీ చేసిన ఆమె, అనంతరం బీజేపీలో చేరారు. 2019, 2024 లోక్‌సభ ఎన్నికల్లో షాహ్‌డోల్ నియోజకవర్గం నుంచి బీజేపీ తరపున గెలిచి వరుసగా రెండుసార్లు ఎంపీ అయ్యారు. మరోవైపు, నరేంద్ర మరావి 2018 అసెంబ్లీ ఎన్నికల్లో పోటీ చేసినప్పటికీ విజయం సాధించలేకపోయారు.
వీరిద్దరి విడిపోవడానికి గల ఖచ్చితమైన కారణాలు బయటకు రానప్పటికీ, రాజకీయ విభేదాలే ప్రధాన కారణమని వార్తలు వినిపిస్తున్నాయి. 2024 లోక్‌సభ ఎన్నికల్లో కూడా నరేంద్ర మరావి బీజేపీ టికెట్ ఆశించినట్లు ప్రచారం జరిగింది. చాలా కాలంగా విడిగా ఉంటున్న వీరి దాంపత్య బంధానికి కోర్టు విడాకుల తీర్పుతో అధికారికంగా తెరపడింది.
Leave a Reply