“ఎలాగైనా కాపాడండి అన్నా!”.. కుటుంబాన్ని గట్టెక్కించేందుకు వెళ్లిన యువకుడికి ఘోర ప్రమాదం.. గుండెల్ని పిండేస్తున్న వైరల్ వీడియో!

ఉత్తరప్రదేశ్ రాష్ట్రం లఖింపూర్ ప్రాంతానికి చెందిన ధనుష్ (25) అనే యువకుడు, తన కుటుంబానికి ఉన్న రూ. 70,000 అప్పును తీర్చడంతో పాటు ఆర్థిక ఇబ్బందుల నుంచి గట్టెక్కించేందుకు కొద్ది నెలల క్రితం మహారాష్ట్రకు వలస వెళ్లాడు.

అక్కడి ఒక బెల్లం తయారీ యూనిట్‌లో కార్మికుడిగా పనిచేస్తున్న అతడు, రోజూలాగే విధుల్లో నిమగ్నమై ఉండగా ఊహించని రీతిలో కాలుజారి ప్రమాదానికి గురయ్యాడు.

ఫ్యాక్టరీలోని భారీ కొప్పెరల్లో బెల్లం పాకం మరుగుతున్న సమయంలో, దాని సమీపంలో నిలబడిన అతడికి ఒక్కసారిగా కళ్లు తిరిగి బ్యాలెన్స్ తప్పడంతో ఆ మరుగుతున్న పాకంలో పడిపోయాడు. ఆ భరించలేని మంటల నుంచి తనను కాపాడాలంటూ “ఎలాగైనా నన్ను కాపాడండి అన్నా” అని అతడు పెట్టిన ఆర్తనాదాలు విని తోటి కార్మికులు పరుగున వచ్చి బయటకు లాగేందుకు తీవ్రంగా శ్రమించారు. ఎంతో కష్టం మీద అతడిని బయటకు తీసినప్పటికీ, అప్పటికే శరీరం మొత్తం తీవ్రంగా కాలిపోయి చర్మం ఊడిపోయింది.

అత్యవసర చికిత్స కోసం అతడిని హుటాహుటిన ఆసుపత్రికి తరలించినప్పటికీ, పరిస్థితి విషమించడంతో చికిత్స పొందుతూ కన్నుమూశాడు. ఈ ప్రమాదానికి సంబంధించిన సీసీటీవీ దృశ్యాలను పోలీసులు కుటుంబ సభ్యులకు చూపించారు. ఈ హృదయ విదారక ఘటన నెట్టింట వైరల్ కావడంతో అందరినీ తీవ్ర దిగ్భ్రాంతికి, విషాదానికి గురిచేస్తోంది.