“ఎవరు సామి నువ్వు! సహాయం చేస్తున్నట్లు నటించి రూ.1.25 లక్షల చోరీ..!” ఫారమ్‌లో అకౌంట్ నంబర్ మార్చేసి ఉడాయించిన వ్యక్తి.. డబ్బులు డిపాజిట్ చేయడానికి వచ్చిన మహిళకు ఎదురైన చేదు అనుభవం.. సీసీటీవీ ఫుటేజీ ఆధారంగా పోలీసుల తీవ్ర దర్యాప్తు..!!

హర్యానా రాష్ట్రంలోని ఓ ఎస్‌బీఐ (SBI) బ్యాంకు బ్రాంచ్‌లో, సహాయం చేస్తున్నట్లు నటించి ఒక మహిళ వద్ద నుంచి రూ.1.25 లక్షల నగదును ఓ గుర్తుతెలియని వ్యక్తి కాజేసిన ఘటన తీవ్ర కలకలం రేపుతోంది.

బాధిత యువతి తన బ్యాంకు ఖాతాలో రూ.1.25 లక్షల నగదును డిపాజిట్ చేయడానికి ఎస్‌బీఐ బ్యాంకుకు వచ్చింది.

ఆ సమయంలో కౌంటర్ వద్ద నిలబడి ఉన్న ఓ వ్యక్తి, ఆమెకు సహాయం చేస్తానని చెప్పి ఆమె దగ్గర ఉన్న డిపాజిట్ ఫారమ్‌పై తప్పు అకౌంట్ నంబర్ రాశాడు. ఆ తర్వాత అకౌంట్ నంబర్ తప్పుగా ఉందని చెప్పి, మరో కొత్త ఫారమ్ నింపాలని ఆ మహిళకు సూచించాడు.

ఆ మహిళ కొత్త ఫారమ్ నింపుతున్న సమయాన్ని ఆసరాగా తీసుకుని, ఆ వ్యక్తి ఆమె వద్ద ఉన్న నగదును, పాస్‌బుక్‌ను తన చేతుల్లోకి తీసుకున్నాడు. ఆ తర్వాత పాస్‌బుక్‌ను మాత్రమే ఆ మహిళకు తిరిగి ఇచ్చేసి, రూ.1.25 లక్షల నగదుతో బ్యాంకు నుంచి పరారయ్యాడు.

బ్యాంకులోని సీసీటీవీ దృశ్యాలను పరిశీలించగా, ఆ వ్యక్తి ఎస్‌బీఐ బ్యాంకు నుంచి బయటకు వచ్చి ఎదురుగా ఉన్న పీఎన్‌బీ (PNB) బ్యాంకు వైపు వెళ్లినట్లు తెలిసింది. ఈ ఘటనపై కేసు నమోదు చేసుకున్న పోలీసులు దర్యాప్తు ప్రారంభించారు. అలాగే, ‘బ్యాంకులకు వెళ్లినప్పుడు పరిచయం లేని వ్యక్తులకు మీ ఫారమ్, పాస్‌బుక్ లేదా డబ్బులు ఇవ్వవద్దు’ అని ప్రజలను హెచ్చరించారు.