న్యూఢిల్లీ ఎయిర్‌పోర్ట్ నుంచి కర్తవ్యపథ్ వరకు ప్రయాణించిన ఓ మహిళ, ప్రయాణ చార్జీల్లో ₹40 తక్కువగా ఇచ్చి క్యాబ్ డ్రైవర్‌తో వాగ్వాదానికి దిగిన ఘటన సోషల్ మీడియాలో వైరల్‌గా మారింది.
మిగిలిన డబ్బులు అడిగిన డ్రైవర్‌తో, “నేను ఆ డబ్బులు ఇవ్వను.. నువ్వు ఏం చేసుకుంటావో చేసుకో” అంటూ ఆ మహిళ నిర్లక్ష్యంగా సమాధానమిచ్చింది.
దీంతో తీవ్ర అసహనానికి గురైన డ్రైవర్, ఆమె కస్టమర్ అకౌంట్‌ను చూపిస్తూ.. “ఇకపై ఎవరూ ఈమెకు క్యాబ్ రైడ్ యాక్సెప్ట్ చేయకండి; డబ్బులు ఇవ్వకపోగా, మర్యాద లేకుండా మాట్లాడుతోంది” అని తోటి డ్రైవర్లను హెచ్చరిస్తూ వీడియో తీసి పోస్ట్ చేశాడు.
దానికి ఆ మహిళ ఏమాత్రం తగ్గకుండా, “అవును.. వెళ్లి అందరికీ చెప్పుకో.. ఇక్కడి నుంచి ముందు నువ్వు వెళ్లు” అంటూ కోపంతో అరుస్తూ డ్రైవర్‌ను అక్కడి నుంచి పంపించివేసింది. చిన్న మొత్తానికి డ్రైవర్‌తో ఆమె ప్రవర్తించిన తీరుపై నెటిజన్లు తీవ్ర ఆగ్రహం వ్యక్తం చేస్తున్నారు.