సింగపూర్లో స్థిరపడిన ఒక విజయవంతమైన భారతీయ మహిళ వివాహం కోసం వెతుకుతున్న ఇబ్బందులను ఒక మ్యాచ్ మేకర్ ఇటీవల బయటపెట్టారు. ఇది సోషల్ మీడియాలో వివాహ అంచనాలు, ప్రాధాన్యతలు మరియు వ్యక్తిగత ప్రమాణాలపై పెద్ద చర్చకు దారితీసింది.
మ్యాచ్ మేకర్ వెల్లడించిన వివరాలు: ఆ మహిళ వయస్సు 39 ఏళ్లు, ఆమె సింగపూర్లో లీగల్ కౌన్సెల్గా పనిచేస్తూ ఏడాదికి సుమారు రూ. 2 కోట్ల ఆదాయాన్ని గడిస్తోంది. గత 12 ఏళ్లుగా ఆమె వివాహం కోసం ప్రయత్నిస్తున్నప్పటికీ, సరైన భాగస్వామి దొరకడం లేదని మ్యాచ్ మేకర్ పేర్కొన్నారు. 27 ఏళ్ల వయస్సు నుండి ఆమె తల్లిదండ్రులు సంబంధాలు చూస్తున్నప్పటికీ, ఇప్పటివరకు ఫలితం లేకపోవడానికి ఆమె విధించిన కఠినమైన నిబంధనలే కారణమని తెలుస్తోంది.
ఆమె అంచనాలు ఇవే: మ్యాచ్ మేకర్ కథనం ప్రకారం, ఆమె తన భాగస్వామికి సంబంధించి అనేక షరతులు విధించింది:
- నివాసం: భాగస్వామి ఇప్పటికే సింగపూర్లో నివసిస్తూ ఉండాలి. పెళ్లి తర్వాత అక్కడికి వచ్చే వారిని ఆమె అంగీకరించడం లేదు. పురుషులు సాధారణంగా భాగస్వాముల కోసం వేరే ప్రాంతానికి మారరని ఆమె నమ్మకం.
- వయస్సు: 42 ఏళ్లలోపు ఉండాలి.
- ఆదాయం: కనీసం తనతో సమానంగా, అంటే ఏటా రూ. 2 కోట్లు లేదా అంతకంటే ఎక్కువ సంపాదించాలి.
- ప్రాంతం & రూపం: ఉత్తర భారతీయుడై ఉండాలి మరియు రూపం పరంగా 10కి కనీసం 7 పాయింట్లు ఉండాలి.
విడాకులు తీసుకున్న వ్యక్తి పట్ల వ్యతిరేకత: ఈ చర్చలో అత్యంత ఆశ్చర్యకరమైన విషయం ఏమిటంటే, విడాకులు తీసుకున్న వ్యక్తిని పెళ్లి చేసుకుంటారా అని అడిగినప్పుడు ఆమె ఘాటుగా స్పందించారు. “మీకు పిచ్చి పట్టిందా? సమాజం నా గురించి ఏమనుకుంటుంది?” అని ఆమె సమాధానమిచ్చారు. ఆమె అనుకుంటున్నట్లుగా బయటి పరిస్థితులు మాత్రమే కాదు, ఆమె విధించుకున్న కఠినమైన నిబంధనలే వివాహం కాకపోవడానికి ప్రధాన కారణమని మ్యాచ్ మేకర్ అభిప్రాయపడ్డారు.