పుణేలో గణపతి ఊరేగింపుల సమయంలో DJ సంగీతం, అధిక శబ్దంతో కూడిన లౌడ్స్పీకర్లకు వ్యతిరేకంగా నిరంతరం గళం వినిపిస్తున్న సామాజిక కార్యకర్త విద్యానంద్ బాబట్, DJ సంగీతానికి అనుగుణంగా డ్యాన్స్ చేస్తున్నట్లుగా రూపొందించిన ఓ AI వీడియో ప్రస్తుతం సోషల్ మీడియాలో వైరల్గా మారింది.
శబ్ద కాలుష్యానికి వ్యతిరేకంగా ఆయన చేస్తున్న పోరాటాన్ని ఎగతాళి చేసే ఉద్దేశంతో ఈ నకిలీ వీడియోను రూపొందించి సోషల్ మీడియాలో ప్రచారం చేస్తున్నట్లు తెలుస్తోంది.
ఈ వైరల్ వీడియోలో పండుగల సమయంలో లౌడ్స్పీకర్ల నుంచి వచ్చే భారీ శబ్దాన్ని వ్యతిరేకించే బాబట్.. ఒక్కసారిగా మనసు మార్చుకుని అదే DJ సంగీతానికి ఉత్సాహంగా డ్యాన్స్ చేస్తున్నట్లుగా AI టెక్నాలజీతో చిత్రీకరించారు.
గణపతి పండుగ ఊరేగింపుల్లో DJ సంస్కృతిని సమర్థించే కొందరు వ్యక్తులు, బాబట్ను వ్యంగ్యంగా చూపించేందుకు ఈ నకిలీ వీడియోను రూపొందించి సోషల్ మీడియాలో షేర్ చేస్తున్నట్లు సమాచారం.
అయితే, ఈ AI రూపొందించిన నకిలీ వీడియోలు తన లక్ష్యాన్ని ఏమాత్రం దెబ్బతీయలేవని విద్యానంద్ బాబట్ స్పష్టం చేశారు.
పండుగల సమయంలో అధిక శబ్ద కాలుష్యం కారణంగా వృద్ధులు, అనారోగ్యంతో బాధపడుతున్న వారు తీవ్రంగా ఇబ్బందులు ఎదుర్కొంటున్నారని ఆయన తెలిపారు.
పండుగలను సంప్రదాయ పద్ధతుల్లో జరుపుకోవాలే తప్ప, నిబంధనలను ఉల్లంఘిస్తూ భారీ శబ్దంతో DJ సంగీతాన్ని వినిపించడాన్ని తాను వ్యతిరేకిస్తూనే ఉంటానని చెప్పారు.
ఈ విషయంలో తన న్యాయపోరాటం, ప్రజల్లో అవగాహన కల్పించే కార్యక్రమాలు నిరంతరం కొనసాగుతాయని విద్యానంద్ బాబట్ స్పష్టం చేశారు.
Leave a Reply