“ఏయ్.. రూ.500 మామూలు ఇస్తావా ఇవ్వవా..?” డిప్యూటీ సీఎం ఫోటో చూపించి పట్టపగలే బహిరంగంగా బెదిరించిన ప్రముఖ యూట్యూబర్.. పోలీస్ స్టేషన్‌లోనే దేహశుద్ధి చేసిన మహిళలు.. వైరల్ అవుతున్న షాకింగ్ వీడియో..!

సోషల్ మీడియాలో కొన్ని వేల మంది ఫాలోవర్లు రాగానే, తమను తాము ఊరినే శాసించే శక్తిగా ఊహించుకుంటూ అమాయక ప్రజలను బెదిరించే ధోరణి ఇటీవల కాలంలో పెరిగిపోతోంది. అలా అధికార బలాన్ని చూపించి మామూళ్లు వసూలు చేయబోయిన ఓ ప్రముఖ యూట్యూబర్‌కు, మహిళలంతా కలిసి పోలీస్ స్టేషన్‌లోనే దేహశుద్ధి చేసిన ఘటన మహారాష్ట్రలో తీవ్ర కలకలం రేపింది.

మహారాష్ట్రలోని థానే జిల్లా కోప్రి ప్రాంతంలో ‘యూట్యూబ్ భాయ్’ (YouTube Bhai)గా పేరొందిన సిద్ధేష్ అభంగే అలియాస్ సిద్ధూ అభంగే అనే వ్యక్తే ప్రస్తుతం ఈ వివాదంలో చిక్కుకుని మహిళల చేతిలో దెబ్బలు తిన్నాడు. థానే కోప్రి ప్రాంతంలోని బట్టల మార్కెట్‌లో ఎంతోమంది మహిళలు వ్యాపారాలు, పనులు చేసుకుంటూ జీవనం సాగిస్తున్నారు. ఈ క్రమంలో, అక్కడి మహిళలతో యూట్యూబర్ సిద్ధేష్ అభంగే తరచూ గొడవ పడుతూ, ప్రతి మహిళ తనకు రూ.500 చొప్పున మామూలు ఇవ్వాలని బలవంతం చేసేవాడని సమాచారం.

డబ్బులు ఇవ్వడానికి నిరాకరించిన మహిళలను బెదిరించడం, వేధించడం వంటి అతని ఆగడాలు శృతిమించడంతో.. ఆగ్రహించిన మహిళలంతా ఏకమై కోప్రి పోలీస్ స్టేషన్‌లో ఫిర్యాదు చేయడానికి తరలివచ్చారు.

పోలీస్ స్టేషన్‌లో మహిళలు ఇచ్చిన ఫిర్యాదుతో పలు విస్తుపోయే విషయాలు వెలుగులోకి వచ్చాయి. సిద్ధేష్ అభంగే మహారాష్ట్ర ఉప ముఖ్యమంత్రి ఏక్‌నాథ్ షిండే, ఎంపీ శ్రీకాంత్ షిండేలతో తాను దిగిన ఫోటోలను ప్రజలకు చూపిస్తూ, తనకు రాజకీయ పలుకుబడి ఉందని భయపెట్టేవాడు. ఆ ఫోటోలను అడ్డం పెట్టుకునే బట్టల మార్కెట్‌లోని మహిళల వద్ద డబ్బులు డిమాండ్ చేస్తూ బెదిరింపులకు పాల్పడేవాడని మహిళలు ఆరోపించారు.

అంతేకాకుండా, ఇతనిపై ఇప్పటికే దొంగతనం, బెదిరించి డబ్బులు వసూలు చేయడం, దాడులు వంటి పలు కేసులు పెండింగ్‌లో ఉన్నాయని.. కొన్ని నెలల క్రితం ఓ క్రికెట్ మ్యాచ్ సమయంలో కూడా గొడవకు దిగాడని మహిళలు పేర్కొన్నారు. అతనిపై ఇప్పటికే పోలీసులకు పలుమార్లు ఫిర్యాదు చేసినా తగిన చర్యలు తీసుకోకపోవడంతో ఆగ్రహించిన వందలాది మంది మహిళలు, సోమవారం నాడు పోలీస్ స్టేషన్‌ను ముట్టడించి గంటల తరబడి నిరసన తెలిపారు.

అదే సమయంలో, అనూహ్యంగా సిద్ధేష్ అభంగే కూడా అదే పోలీస్ స్టేషన్‌కు వచ్చాడు. అతడిని చూడగానే భగ్గుమన్న మహిళలు, అతనితో తీవ్ర వాగ్వాదానికి దిగారు. మాటామాటా పెరగడంతో ఆగ్రహం కట్టలు తెంచుకున్న కొందరు మహిళలు.. పోలీస్ స్టేషన్‌లోనే సిద్ధేష్ అభంగేను చుట్టుముట్టి చితకబాదారు. దీంతో పోలీస్ స్టేషన్ ఆవరణ రణరంగంగా మారింది.

గంటల తరబడి సాగిన ఆందోళన తర్వాత, మహిళల ఫిర్యాదులు మరియు పాత కేసులపై సమగ్ర విచారణ జరిపి, నిందితుడిపై తగిన చట్టపరమైన చర్యలు తీసుకుంటామని పోలీసులు హామీ ఇచ్చారు. దీంతో మహిళలు ఆందోళన విరమించి వెళ్లిపోయారు. రాజకీయ నాయకుల ఫోటోలు చూపించి మహిళల నుంచి మామూళ్లు వసూలు చేయాలనుకున్న యూట్యూబర్‌కు, పోలీస్ స్టేషన్‌లోనే మహిళలు తగిన గుణపాఠం చెప్పిన ఈ ఘటన థానే ప్రాంతంలో పెను సంచలనంగా మారింది.