మాస్కో: కార్పొరేట్ ఉద్యోగాల ఒత్తిడి నుండి బయటపడటానికి భిన్నమైన మార్గాలను ఎంచుకునే వారి గురించి మనం తరచుగా వింటుంటాం. కానీ, భారత్‌కు చెందిన 26 ఏళ్ల ముఖేష్ మండల్ కథ వాటన్నింటికంటే ప్రత్యేకం. భారతదేశంలో సాఫ్ట్‌వేర్ డెవలపర్‌గా పనిచేసిన ముఖేష్, నేడు రష్యాలోని సెయింట్ పీటర్స్‌బర్గ్ వీధులను శుభ్రం చేసే స్వీపర్‌గా పనిచేస్తున్నాడు.
రష్యన్ వార్తా సంస్థ ‘ఫాంటాంకా’ (Fontanka) ముఖేష్ యొక్క ఈ అరుదైన జీవిత కథను వెలుగులోకి తెచ్చింది. మైక్రోసాఫ్ట్ వంటి ప్రముఖ సంస్థల్లో డెవలపర్‌గా పనిచేసిన ముఖేష్, ఆర్టిఫిషియల్ ఇంటెలిజెన్స్ (AI), చాట్ జీపీటీ వంటి అత్యాధునిక సాంకేతిక పరిజ్ఞానాలలో నిపుణుడు కావడం విశేషం.
“నేను వృత్తిరీత్యా డెవలపర్‌ని. మైక్రోసాఫ్ట్ వంటి కంపెనీలలో పనిచేశాను. కానీ ఇప్పుడు సెయింట్ పీటర్స్‌బర్గ్ వీధులను శుభ్రం చేసే పని చేస్తున్నాను. ఈ పనిలో నేను చాలా సంతోషంగా ఉన్నాను” అని ముఖేష్ మండల్ తెలిపాడు.
రష్యాలో కార్మికుల కొరతను తీర్చడానికి చేపట్టిన ప్రత్యేక పథకంలో భాగంగా ముఖేష్‌తో సహా 17 మంది భారతీయుల బృందం సెయింట్ పీటర్స్‌బర్గ్ చేరుకుంది. ఒక రష్యన్ రోడ్ మెయింటెనెన్స్ కంపెనీ వీరిని నియమించుకుంది. ముఖేష్ నెలకు సుమారు 1,00,000 రూబుల్స్ (సుమారు రూ. 1,13,669) సంపాదిస్తున్నాడు. వసతి, ఆహారం, ప్రయాణ ఖర్చులు మరియు రక్షణ దుస్తులను కంపెనీయే అందిస్తోంది.
ముఖేష్‌తో పాటు వచ్చిన బృందంలో ఆర్కిటెక్ట్లు, ఈవెంట్ ఆర్గనైజర్లు, టెక్నీషియన్లు, డ్రైవర్లు మరియు రైతులు కూడా ఉన్నారు. మెరుగైన ఆదాయం కోసం వీరంతా స్వచ్ఛందంగా రష్యాకు వెళ్లారు. “పనే దైవం.. అది టాయిలెట్ కడగడం కావచ్చు లేదా వీధులు ఊడవడం కావచ్చు, బాధ్యతగా చేయడం ముఖ్యం” అని ముఖేష్ తన పని పట్ల ఉన్న గౌరవాన్ని చాటుకున్నాడు.