భారతదేశంలో మరో కొన్ని ఏళ్లలో ఇంజనీర్లు, ఐటీ ఉద్యోగులు వంటి ‘వైట్-కాలర్’ గ్రాడ్యుయేట్ల కంటే.. ప్లంబర్లు, ఎలక్ట్రీషియన్లు, డ్రైవర్లు వంటి ‘బ్లూ-కాలర్’ కార్మికులకు తీవ్రమైన కొరత ఏర్పడనుంది. దీనివల్ల ఈ విభాగాల్లోని వారి వేతనాలు మరియు డిమాండ్ భారీగా పెరగనున్నాయి.
కెనడాకు చెందిన ‘పైన్ట్రీ’ (Pinetree) మాక్రో ట్రెండ్స్ రీసెర్చ్ సంస్థ వ్యవస్థాపకుడు రితేష్ జైన్, ప్రపంచవ్యాప్త ఉపాధి మార్కెట్లో వస్తున్న మార్పుల గురించి లింక్డ్ఇన్ వేదికగా కీలక విషయాలను పంచుకున్నారు.
ప్రపంచ దేశాల్లో పరిస్థితులు: ఐరోపా, ఉత్తర అమెరికా మరియు ఆసియాలోని అభివృద్ధి చెందిన దేశాల్లో (ఉదాహరణకు జర్మనీ, అమెరికా) వృద్ధుల జనాభా వేగంగా పెరుగుతోంది. జనన రేటు గణనీయంగా పడిపోయింది. 1970ల తర్వాత ప్రపంచవ్యాప్తంగా 65 ఏళ్లు పైబడిన వారి సంఖ్య దాదాపు రెట్టింపు అయ్యింది. జనాభాను స్థిరంగా ఉంచడానికి ఒక దేశంలో సంతానోత్పత్తి రేటు (Replacement Rate) 2.1 ఉండాలి, కానీ చాలా దేశాల్లో ఇది అంతకంటే తక్కువగా ఉంది.
బ్లూ-కాలర్ ఉద్యోగాల డిమాండ్: 2023 నాటి డేటా ప్రకారం, యూరోపియన్ యూనియన్లోని దాదాపు 75% సంస్థలు నైపుణ్యం కలిగిన కార్మికులు దొరక్క ఇబ్బంది పడుతున్నాయి. 2024లో జర్మనీలో 80% పైగా యజమానులు నియామకాల్లో సమస్యలను ఎదుర్కొంటున్నారు. ముఖ్యంగా ప్లంబర్లు, ఎలక్ట్రీషియన్లు, డ్రైవర్లకు విపరీతమైన డిమాండ్ ఉంది. ప్రపంచవ్యాప్తంగా వైట్-కాలర్ ఉద్యోగులు ఎక్కువగా ఉన్నా, బ్లూ-కాలర్ కార్మికులు తక్కువగా ఉన్నారని రితేష్ జైన్ పేర్కొన్నారు. ఈ జనాభా క్షీణతను భర్తీ చేయడానికి ధనిక దేశాలు భారతీయ బ్లూ-కాలర్ కార్మికులను తమ దేశాలకు ఆహ్వానిస్తున్నాయి.
భారతదేశం ఎదుర్కోబోయే సవాలు: అమెరికా వంటి దేశాల్లో రాబోయే కొన్నేళ్లలో లక్షలాది మంది ప్లంబర్లు, ఎలక్ట్రీషియన్ల కొరత ఏర్పడనుంది. అందుకే, నైపుణ్యం కలిగిన భారతీయులను ఆకర్షించేందుకు ఆ దేశాలు ‘ఫాస్ట్-ట్రాక్ వీసా’ వంటి ప్రోత్సాహకాలను అందిస్తున్నాయి. “రాబోయే ఐదేళ్లలో భారతదేశంలోనే ప్లంబర్లు, ఎలక్ట్రీషియన్లు, వడ్రంగులు, డ్రైవర్లు, నర్సులు మరియు వృద్ధుల సంరక్షకులకు తీవ్ర కొరత ఏర్పడుతుంది. ఎందుకంటే, ఇక్కడ ఉన్న నైపుణ్యం కలిగిన వారంతా మెరుగైన వేతనాల కోసం విదేశాలకు వలస వెళ్తారు” అని రితేష్ జైన్ హెచ్చరించారు.
నిరుద్యోగ సమస్య: అంతర్జాతీయ మార్కెట్కు కావాల్సిన మానవ వనరులను మనం తయారు చేయలేకపోవడం విచారకరం. భారతదేశంలో డిగ్రీ పూర్తి చేసిన యువతలో నిరుద్యోగిత రేటు దాదాపు 40% వద్ద ఉంది. ఇది తక్కువ విద్యావంతుల నిరుద్యోగిత కంటే చాలా ఎక్కువ. కాలేజీ నుండి బయటకు వచ్చే గ్రాడ్యుయేట్లలో కేవలం 14 మందిలో ఒక్కరికి మాత్రమే మొదటి సంవత్సరంలో స్థిరమైన ఉద్యోగం దక్కుతోంది. రాబోయే పదేళ్లలో భారతదేశంలో లాజిస్టిక్స్, నిర్మాణం మరియు తయారీ రంగాల్లో కోట్లాది బ్లూ-కాలర్ ఉద్యోగాలు రాబోతున్నాయి. కానీ, అందుకు తగిన సాంకేతిక నైపుణ్యం మన యువతలో లోపించింది. పైగా, తర్వాతి తరం యువత ఇటువంటి పనులను చేయడానికి ఇష్టపడటం లేదు.