నాసిక్: దేశీ ఐటీ దిగ్గజం టాటా కన్సల్టెన్సీ సర్వీసెస్ (TCS) నాసిక్ కార్యాలయం వేదికగా వెలుగులోకి వచ్చిన ఓ దారుణ ఉదంతం ఇప్పుడు దేశవ్యాప్తంగా సంచలనం సృష్టిస్తోంది. సాఫ్ట్‌వేర్ కంపెనీలో టీమ్ లీడర్లుగా పనిచేస్తున్న కొందరు వ్యక్తులు మహిళా ఉద్యೋಗినులపై లైಂಗిక వేధింపులకు పాల్పడటమే కాకుండా, వారిని మతం మార్చాలని ఒత్తిడి చేసినట్లు ఆరోపణలు రావడంతో పోలీసులు రంగంలోకి దిగారు. అధికార బీజేపీ దీనిని ‘కార్పొరేట్ జిహాద్’ గా అభివర్ణించడంతో ఈ వివాదం రాజకీయ రంగు పులుముకుంది.
ఎఫ్.ఐ.ఆర్ (FIR)లో దిగ్భ్రాంతికర నిజాలు
నాసిక్ పోలీసు స్టేషన్‌లో నమోదైన ఫిర్యాదు ప్రకారం.. ఈ దారుణమైన నెట్‌వర్క్ 2022 నుండే కార్యకలాపాలు సాగిస్తోంది.
- టార్గెట్: 18 నుండి 25 ఏళ్ల లోపు ఉన్న హిందూ యువతులను లక్ష్యంగా చేసుకుని ఈ ముఠా వల విసురుతోంది.
- వేధింపులు: మొదట పని వేళల్లో లైంగికంగా వేధించడం, ఆపై వారి బలహీనతలను ఆసరాగా చేసుకుని బలవంతపు మతాంతరాలకు పురికొల్పడం ఈ ముఠా పనితీరుగా తెలుస్తోంది.
- అరెస్టులు: ఇప్పటివరకు ఈ కేసులో ఆరుగురిని పోలీసులు అరెస్ట్ చేశారు. వారిని ఆసిఫ్ అన్సారి, షఫీ షేక్, షారూఖ్ ఖురేషీ, రజా మెమన్, తౌసిఫ్ అత్తర్ మరియు అశ్విన్ చైనానీగా గుర్తించారు.
నమాజ్ చేస్తేనే శాశ్వత ఉద్యోగం!
ఈ ఘటనపై మహారాష్ట్ర మంత్రి గిరీష్ మహాజన్ తీవ్రంగా స్పందించారు. కంపెనీలోని కొందరు ముస్లిం యువకులు హిందూ యువతులే లక్ష్యంగా కుట్ర పన్నారని ఆయన ఆరోపించారు. “అధిక జీతం ఇప్పిస్తామని, ఉద్యోగం పర్మనెంట్ చేయిస్తామని నమ్మబలికి యువతులను లోబరుచుకుంటున్నారు. ఆ తర్వాత వారిని బలవంతంగా నమాజ్ చేయాలని, మతం మారాలని వేధిస్తున్నారు” అని మంత్రి పేర్కొన్నారు.
రంగంలోకి 12 బృందాల ప్రత్యేక దళం
ఈ కేసును అత్యంత తీవ్రంగా పరిగణిస్తున్నట్లు నాసిక్ పోలీస్ కమిషనర్ వెల్లడించారు.
“మేము ఇప్పటికే ఎఫ్.ఐ.ఆర్ నమోదు చేసి నిందితులను అదుపులోకి తీసుకున్నాం. ఈ కుట్ర వెనుక ఉన్న లోతైన మూలాలను ఛేదించేందుకు 12 మంది పోలీసు అధికారులతో ప్రత్యేక బృందాన్ని ఏర్పాటు చేశాం. బాధితులకు న్యాయం చేస్తాం, నిందితులకు కఠిన శిక్ష పడేలా చూస్తాం” అని కమిషనర్ హామీ ఇచ్చారు.
కార్పొరేట్ సంస్థల్లో ఇలాంటి మతపరమైన, లైంగిక వేధింపుల ఆరోపణలు రావడం ఐటీ రంగంలో పెను సంచలనంగా మారింది. ఈ ఉదంతంపై టీసీఎస్ యాజమాన్యం అధికారికంగా స్పందించాల్సి ఉంది.