అమెరికా-ఇజ్రాయెల్ మధ్య జరుగుతున్న యుద్ధంలో ఇరాన్‌కు మరో కోలుకోలేని దెబ్బ తగిలింది. టెహ్రాన్‌పై తాము జరిపిన వైమానిక దాడుల్లో ఇరాన్ నిఘా వ్యవహారాల మంత్రి ఎస్మాయిల్ ఖతీబ్ మరణించినట్లు ఇజ్రాయెల్ ప్రకటించింది.
ఇప్పటికే అగ్రశ్రేణి సెక్యూరిటీ చీఫ్ అలీ లారిజానీ, రివల్యూషనరీ గార్డ్స్ బాసిజ్ ఫోర్స్ అధిపతి జనరల్ గులాం రజా సులేమానీలను ఇజ్రాయెల్ మట్టుబెట్టగా, ఇప్పుడు ఖతీబ్ మరణం ఇరాన్ నిఘా వ్యవస్థను కుప్పకూల్చినట్లయ్యింది.
ఎవరు ఈ ఎస్మాయిల్ ఖతీబ్? అమెరికా-ఇజ్రాయెల్‌కు ఎందుకు సింహస్వప్నం?
ఎస్మాయిల్ ఖతీబ్‌ను కేవలం ఒక నిఘా అధికారిగానే కాకుండా, అంతర్జాతీయ స్థాయిలో అత్యంత ప్రమాదకరమైన వ్యూహకర్తగా పరిగణిస్తారు. ఆయన గురించి కొన్ని ఆసక్తికర అంశాలు:
- సైబర్ దాడుల సూత్రధారి: అమెరికా మరియు దాని మిత్రదేశాలపై సైబర్ గూఢచర్యం, ‘రాన్సమ్‌వేర్’ దాడులు చేసిన నెట్‌వర్క్‌లను ఖతీబ్ స్వయంగా నడిపేవారని అమెరికా ట్రెజరీ విభాగం గతంలోనే ఆరోపించింది. దీనివల్ల 2022లో అమెరికా ఆయనపై కఠినమైన ఆంక్షలు విధించింది.
- అల్బేనియా వెబ్‌సైట్ల హ్యాకింగ్: అల్బేనియా ప్రభుత్వ వెబ్‌సైట్లను హ్యాక్ చేసి, అక్కడి పౌరుల రహస్య పత్రాలు మరియు వ్యక్తిగత వివరాలను బహిర్గతం చేసిన ఆరోపణలు కూడా ఆయనపై ఉన్నాయి.
- అణు రహస్యాల చోరీ: గత ఏడాది జూన్‌లో ఇజ్రాయెల్‌కు చెందిన ‘సోరెక్ న్యూక్లియర్ రీసెర్చ్ సెంటర్’ నుండి అత్యంత సున్నితమైన అణు పత్రాలను ఇరాన్ దొంగిలించిందని ఖతీబ్ ప్రకటించి సంచలనం సృష్టించారు.
- అణచివేత చర్యలు: ఇరాన్ లోపల మానవ హక్కుల కార్యకర్తలు, జర్నలిస్టులు మరియు మతపరమైన అల్పసంఖ్యాక వర్గాలపై దారుణమైన అణచివేత చర్యలు చేపట్టడంలో ఖతీబ్ కీలక పాత్ర పోషించారు. ముఖ్యంగా ‘మహసా అమీనీ’ మరణం తర్వాత జరిగిన దేశవ్యాప్త నిరసనలను ఇనుప పాదంతో అణిచివేశారని ఐడీఎఫ్ ఆరోపించింది.
నేపథ్యం:
- జననం: 1960 లేదా 1961లో దక్షిణ ఖురాసాన్ ప్రాంతంలో జన్మించారు.
- కెరీర్: ఆయన ఒక షియా మత గురువు. 1980లలో ఇరాన్-ఇరాక్ యుద్ధంలో రివల్యూషనరీ గార్డ్స్ (IRGC) తరపున పోరాడి గాయపడ్డారు.
- నియామకం: 2021లో అప్పటి సుప్రీం లీడర్ అయాతుల్లా అలీ ఖమేనీ ఆయనను ఇంటెలిజెన్స్ మంత్రిగా నియమించారు.
ప్రపంచవ్యాప్తంగా ఇజ్రాయెల్ మరియు అమెరికా పౌరులకు వ్యతిరేకంగా గూఢచర్యం మరియు రహస్య ఆపరేషన్లు చేయడంలో ఖతీబ్ నేతృత్వంలోని మంత్రిత్వ శాఖ అత్యంత ఆధునిక సాంకేతికతను ఉపయోగించేదని సమాచారం.