ఛత్తీస్గఢ్ రాష్ట్రంలో మైనర్ బాలుడు అతివేగంగా నడిపిన కారు స్కూటర్ను బలంగా ఢీకొట్టడంతో, ద్విచక్ర వాహనంపై వెళ్తున్న విద్యార్థి అక్కడికక్కడే దుర్మరణం పాలయ్యాడు.
ప్రమాదానికి కారణమైన ఆ మైనర్ మద్యం మత్తులో ఉన్నట్లు సమాచారం అందడంతో, ఈ ఘటన స్థానికంగా తీవ్ర ఆగ్రహావేశాలకు, ఉద్రిక్తతకు దారితీసింది.
ప్రమాదం జరిగిన కొద్ది నిమిషాల్లోనే.. ధ్వంసమైన వాహనాలు, ఘటనా స్థలంలో గుమిగూడిన ప్రజలు తీవ్ర ఆగ్రహంతో నిలదీస్తున్న వీడియోలు సోషల్ మీడియాలో దావానలంలా వ్యాపించాయి. వీటన్నింటికీ మించి, ప్రమాదం జరిగిన కారు లోపల ఉన్న ఒక జంట అసభ్యంగా ముద్దులు పెట్టుకుంటూ ఉన్న దృశ్యాలు ఆ వీడియోలో రికార్డవ్వడం చూసి నెటిజన్లు, స్థానికులు తీవ్రంగా మండిపడుతున్నారు.
మైనర్లకు వాహనాలు ఇవ్వడం, వారు నిర్లక్ష్యంగా డ్రైవింగ్ చేయడంపై సామాజిక కార్యకర్తలు తీవ్ర ఆందోళన వ్యక్తం చేస్తున్నారు. మోటారు వాహనాల చట్టం ప్రకారం, మైనర్లకు వాహనాలు ఇచ్చే తల్లిదండ్రులకు లేదా వాహన యజమానులకు జైలు శిక్ష, భారీ జరిమానాతో పాటు వాహన రిజిస్ట్రేషన్ రద్దు వంటి కఠిన శిక్షలు పడే అవకాశముంది.
హుటాహుటిన ఘటనా స్థలానికి చేరుకున్న పోలీసులు.. ప్రమాదానికి గురైన వాహనాలను స్వాధీనం చేసుకుని ట్రాఫిక్ను పునరుద్ధరించారు. అలాగే, నిర్లక్ష్యంగా వాహనం నడిపి మరణానికి కారణమైనందుకు భారతీయ న్యాయ సంహిత (BNS) కీలక సెక్షన్ల కింద కేసు నమోదు చేసి దర్యాప్తు ముమ్మరం చేశారు.
ఈ రోడ్డు ప్రమాదానికి గల అసలు కారణాలను నిగ్గుతేల్చేందుకు ఆ ప్రాంతంలోని సీసీటీవీ ఫుటేజీలను పరిశీలిస్తున్న పోలీసులు, ప్రత్యక్ష సాక్షులను కూడా విచారిస్తున్నారు. నిందితులపై చట్టపరంగా కఠిన చర్యలు తీసుకుంటామని పోలీసులు స్పష్టం చేశారు.