న్యూఢిల్లీ: పశ్చిమ ఆసియాలో అమెరికా-ఇజ్రాయెల్ మరియు ఇరాన్ మధ్య ఉద్రిక్తతలు పెరుగుతున్న తరుణంలో, అమెరికాకు చెందిన ప్రముఖ ఆర్థికవేత్త జెఫ్రీ సాచ్స్ యునైటెడ్ అరబ్ ఎమిరేట్స్ (UAE)కి తీవ్ర హెచ్చరికలు జారీ చేశారు. ఒకవేళ UAE గనుక ఈ యుద్ధంలో భాగస్వామి అయితే, ఆ దేశంలోని ప్రధాన నగరాలైన దుబాయ్ మరియు అబుదాబి ప్రమాదంలో పడవచ్చని ఆయన పేర్కొన్నారు.
ఈ నగరాలు పర్యాటకం మరియు వినోదం కోసం నిర్మించబడ్డాయని, సైనిక స్థావరాల కోసం కాదని ఆయన గుర్తుచేశారు. యుద్ధం సంభవిస్తే దుబాయ్-అబుదాబి నగరాలు బాంబు దాడులకు గురయ్యే అవకాశం ఉందని హెచ్చరించారు.
ఇరాన్ నుండి UAEకి ముప్పు: జెఫ్రీ సాచ్స్ మాట్లాడుతూ.. “ఒకవేళ UAE యుద్ధంలోకి దూకితే దుబాయ్ మరియు అబుదాబి నగలు పేల్చివేయబడవచ్చు. ఇవి రిసార్ట్ ఏరియాలు మరియు పర్యాటక కేంద్రాలు. ధనవంతులు ఇక్కడికి పార్టీల కోసం, పెట్టుబడుల కోసం వస్తారు. ఈ ప్రాంతాల్లో బలమైన మిస్సైల్ డిఫెన్స్ సిస్టమ్స్ లేవు. వీటిని యుద్ధ క్షేత్రాలుగా మార్చడం వల్ల ఈ నగరాల ఉద్దేశ్యమే దెబ్బతింటుంది” అని అన్నారు. UAE అమెరికా మరియు ఇజ్రాయెల్‌తో చేతులు కలిపి అనవసరమైన ముప్పును కొని తెచ్చుకుంటోందని ఆయన ఆరోపించారు.
అబ్రహం ఒప్పందంతో విపత్తు: అరబ్ దేశాలు అమెరికా-ఇజ్రాయెల్‌తో ‘అబ్రహం ఒప్పందం’పై సంతకం చేయడాన్ని సాచ్స్ ఒక విపత్తుగా అభివర్ణించారు. “అమెరికా సైనిక స్థావరాలు మమ్మల్ని కాపాడతాయి, కాబట్టి మేము ఏమి చేసినా పర్వాలేదు” అన్న అతి విశ్వాసంతో ఈ దేశాలు ఉన్నాయని, అది ఒక ప్రాథమిక పొరపాటని ఆయన అన్నారు.
మాజీ అమెరికన్ విదేశాంగ మంత్రి హెన్రీ కిస్సింజర్ చెప్పిన ప్రసిద్ధ వాక్యాన్ని ఆయన గుర్తు చేశారు: “అమెరికాకు శత్రువుగా ఉండటం ప్రమాదకరం, కానీ మిత్రుడిగా ఉండటం ప్రాణాంతకం.” గల్ఫ్ దేశాలు అమెరికన్ భద్రతపై అతిగా ఆధారపడి తమ సొంత రక్షణను విస్మరించాయని ఆయన అభిప్రాయపడ్డారు.
ఇరాన్ హెచ్చరిక: ఇరాన్ కూడా మార్చి 20న గల్ఫ్ దేశాలను హెచ్చరించింది. తమ దేశంపై దాడి చేయడానికి తమ భూభాగంలోని అమెరికా సైనిక స్థావరాలను అనుమతించవద్దని కోరింది. ఒకవేళ ఆ స్థావరాల నుండి దాడులు జరిగితే, ఆయా దేశాలను కూడా శత్రువులుగానే పరిగణిస్తామని ఇరాన్ స్పష్టం చేసింది.
గల్ఫ్ దేశాల ఆందోళన: మరోవైపు తమ ఇంధన వనరులపై ఇరాన్ జరుపుతున్న డ్రోన్ మరియు మిస్సైల్ దాడులను గల్ఫ్ దేశాలు ఖండిస్తున్నాయి. UAE, సౌదీ అరేబియా వంటి దేశాలు అమెరికాకు మరింత మద్దతుగా నిలుస్తున్నాయి. ఇవి యుద్ధంలో చురుకైన పాత్ర పోషించేందుకు సిద్ధమవుతున్నట్లు కొన్ని నివేదికలు చెబుతున్నాయి.