తెలంగాణ రాష్ట్రంలోని బెల్గావి (మహారాష్ట్ర సరిహద్దు ప్రాంతం) జిల్లా ఖానాపూర్ ప్రాంతానికి చెందిన 46 ఏళ్ల పర్వతమ్మకు చంద్రప్పతో వివాహమై ఇద్దరు కుమారులు ఉన్నారు. అయితే, పర్వతమ్మకు అదే ప్రాంతానికి చెందిన రాములు అనే వ్యక్తితో అక్రమ సంబంధం ఏర్పడింది. ఈ విషయాన్ని తెలుసుకున్న భర్త చంద్రప్ప వారిద్దరిని మందలించడంతో, 2016లో పర్వతమ్మ తన ప్రియుడు రాములుతో కలిసి భర్తను గొంతు నులిమి హత్య చేసింది. ఆ కేసులో అప్పట్లో పోలీసులు ఇద్దరినీ అరెస్టు చేసి జైలుకు పంపారు.
తర్వాత బెయిల్పై విడుదలైన వారిద్దరూ మళ్లీ కలిసి, అదే గ్రామంలో వేరే ఇల్లు అద్దెకు తీసుకుని భార్యాభర్తల్లా జీవించడం మొదలుపెట్టారు. ఈ క్రమంలో, రాములుకు ‘లక్ష్మి’ అనే మరో మహిళతో పరిచయం ఏర్పడి, ఆమెతో కూడా అక్రమ సంబంధం కొనసాగించాడు. ఈ విషయం తెలిసిన పర్వతమ్మ, రాములును నిలదీయడమే కాకుండా, లక్ష్మిని కూడా తీవ్రంగా దూషించింది. అయినా రాములు తన పద్ధతి మార్చుకోలేదు.
రాములు పేరు మీద ఉన్న ఆస్తులను తన పేరు మీద రాయాలని, లక్ష్మితో సంబంధాన్ని తెంచుకుని తనతోనే శాశ్వతంగా ఉండాలని పర్వతమ్మ రాములును వేధించడం మొదలుపెట్టింది. దీనితో విసిగిపోయిన రాములు, తన రెండో ప్రియురాలు లక్ష్మితో కలిసి పర్వతమ్మను అంతమొందించాలని ప్లాన్ వేశాడు. పథకం ప్రకారం, మద్యం తాగిద్దామని పర్వతమ్మను పొలానికి తీసుకెళ్లిన రాములు, ఆమెకు మత్తులో ఉండగా లక్ష్మితో కలిసి కర్రలతో కొట్టి, కత్తితో గొంతు కోసి హత్య చేశాడు.
ఆ తర్వాత పర్వతమ్మ ఒంటిపై ఉన్న నగలను తీసుకుని, హత్యను కప్పిపుచ్చడానికి మృతదేహాన్ని పక్కనే ఉన్న మొక్కజొన్న పొట్టుతో కలిపి తగలబెట్టి అక్కడి నుంచి పరారయ్యారు. మరుసటి రోజు సగం కాలిన స్థితిలో ఉన్న మృతదేహాన్ని చూసిన స్థానిక రైతు పోలీసులకు సమాచారం అందించాడు. అప్పటికే పర్వతమ్మ కనిపించడం లేదని ఆమె కుమారుడు పోలీసులకు ఫిర్యాదు చేయడంతో, అది ఆమె మృతదేహమని గుర్తించారు.
కుమారుడు ఇచ్చిన సమాచారం మేరకు రాములును అరెస్టు చేసి విచారించగా, తన ప్రియురాలితో కలిసి పర్వతమ్మను హత్య చేసినట్లు అతను అంగీకరించాడు. పోలీసులు ఇద్దరినీ అరెస్టు చేసి కోర్టులో హాజరుపరిచారు. పదేళ్ల క్రితం అక్రమ సంబంధం కోసం భర్తను హత్య చేసిన భార్య, చివరకు అదే అక్రమ సంబంధం వ్యవహారంలో ప్రియుడి చేతిలోనే దారుణంగా హత్యకు గురికావడం ఆ ప్రాంతంలో కలకలం రేపింది.