భారతదేశంలో నివసిస్తున్న మేసీ డై (Macy Dye) అనే అమెరికన్ జంట, ఇక్కడి ఒక హై-ఎండ్ సూపర్ మార్కెట్లో అమెరికన్ గ్రోసరీ మరియు ఆహార పదార్థాల ధరలను చూసి ఆశ్చర్యపోయారు. దీనికి సంబంధించిన ఇన్స్టాగ్రామ్ రీల్స్ వీడియో ఇప్పుడు సోషల్ మీడియాలో పెద్ద చర్చకు దారితీసింది.
“భారతదేశంలో అమెరికన్ గ్రోసరీ ధరలు ఎంత ఉంటాయో చూడండి” అంటూ ప్రారంభమైన ఆ వీడియోలో, చిప్స్ ప్యాకెట్ నుండి టొమాటో కెచప్ వరకు వివిధ వస్తువుల ధరలను ఆమె చూపించారు. చివరగా, ఒక చిన్న ప్యాకెట్ అమెరికన్ స్ట్రాబెర్రీల ధర 18 డాలర్లు, అంటే భారత కరెన్సీలో సుమారు రూ. 1,700 ఉండటం చూసి ఆమె షాక్ అయ్యారు. “సొంత ఊరి జ్ఞాపకాలను ఆస్వాదించడానికి మనం చెల్లించాల్సిన చిన్న ధర ఇది” అని ఆమె సరదాగా వ్యాఖ్యానించారు. ఈ వీడియో ఇప్పుడు ఇంటర్నెట్లో తెగ వైరల్ అవుతోంది.
ఈ వీడియోపై నెటిజన్లు రకరకాలుగా స్పందిస్తున్నారు. ఒక వినియోగదారుడు, “అమెరికాలో మేము 18 డాలర్లు పెట్టి పనీర్ కొనడం కూడా ఇంతే” అని వ్యాఖ్యానించగా, మరొకరు “ఇవి స్థానిక పండ్లు కావు, అమెరికా నుండి నేరుగా దిగుమతి చేసుకున్నవి కాబట్టే ధర ఎక్కువగా ఉంది. చౌకగా కావాలంటే స్థానికంగా తయారయ్యే వస్తువులను కొనొచ్చు కదా!” అని వివరణ ఇచ్చారు.
ఇటువంటి వస్తువులను విదేశాల నుండి దిగుమతి చేసుకోవడం వల్లే ధరలు ఎక్కువగా ఉంటాయని, ఆ విషయం తనకు తెలుసని మేసీ డై పేర్కొన్నారు. ఈ వీడియో ప్రస్తుతం నెట్టింట ట్రెండ్ అవుతుండటంతో, నెటిజన్లు ఈ విషయంపై ఆసక్తిగా చర్చించుకుంటున్నారు.