హోర్ముజ్ జలసంధి (Strait of Hormuz) గుండా భారతీయ జెండా ఉన్న లేదా భారత్‌కు వచ్చే నౌకల సురక్షిత ప్రయాణానికి అనుమతి ఇచ్చేందుకు బదులుగా.. భారత్ సీజ్ చేసిన తమ మూడు ట్యాంకర్లను విడుదల చేయాలని ఇరాన్ డిమాండ్ చేస్తోంది. రాయిటర్స్ నివేదిక ప్రకారం, ఈ విషయంలో భారత్‌తో జరిపిన చర్చల్లో టెహ్రాన్ ఈ షరతును విధించింది.
సరళంగా చెప్పాలంటే, ఇది ‘ఒక చేత్తో ఇచ్చి మరో చేత్తో పుచ్చుకోవడం’ వంటి షరతు. అంటే లావాదేవీల్లో ఎలాంటి లోటు ఉండకూడదని, సాయం కావాలంటే సాయం చేయాలని ఇరాన్ స్పష్టం చేస్తోంది. ఫిబ్రవరిలో భారత్ మూడు ట్యాంకర్లను (ఎస్ఫాల్ట్ స్టార్, అల్ జాఫ్జియా మరియు స్టెల్లార్ రూబీ) స్వాధీనం చేసుకుందని ఈ నివేదిక పేర్కొంది. ఇవి తమ గుర్తింపును దాచడం లేదా మార్చడం మరియు సముద్రంలో అక్రమంగా చమురు బదిలీకి పాల్పడినట్లు ఆరోపణలు ఉన్నాయి. వీటిలో ‘స్టెల్లార్ రూబీ’ ఇరాన్ జెడాతో ఉండగా, మిగిలిన రెండు నికరాగ్వా మరియు మాలి దేశాల జెండాలతో ఉన్నట్లు సమాచారం.
ఒక ఇరాన్ అధికారి తెలిపిన వివరాల ప్రకారం.. ఇరాన్ కొన్ని మందులు మరియు వైద్య పరికరాల సరఫరాను కూడా కోరింది. న్యూఢిల్లీలోని ఇరాన్ రాయబారి సోమవారం భారత విదేశాంగ మంత్రిత్వ శాఖ అధికారులతో భేటీ అయి ఈ విషయంపై చర్చించినట్లు రాయిటర్స్ తెలిపింది.
భారత ప్రభుత్వ స్పందన: మరోవైపు, భారత ప్రభుత్వ విశ్వసనీయ వర్గాలు ఈ నివేదికను కేవలం నిరాధారమైనది మరియు అవాస్తవమైనది అని కొట్టిపారేశాయి. నివేదికలో పేర్కొన్నట్లుగా భారత మరియు ఇరాన్ అధికారుల మధ్య ఇటీవల ఎలాంటి చర్చలు జరగలేదని స్పష్టం చేశాయి. అంతేకాకుండా, ఆ మూడు నౌకలు ఇరాన్ యాజమాన్యంలోనివి కావని కూడా ఆ వర్గాలు తెలిపాయి.
ప్రస్తుత పరిస్థితి: ఈ పరిణామాల మధ్య, సుమారు 40,000 మెట్రిక్ టన్నుల LPGతో ఉన్న భారతీయ నౌక ‘శివాలిక్’ సోమవారం సాయంత్రం గుజరాత్‌లోని ముంద్రా పోర్టుకు సురక్షితంగా చేరుకుంది. ఇది హోర్ముజ్ జలసంధి గుండా క్షేమంగా ప్రయాణించి వచ్చింది. ఈ నౌకలోని సరుకు అన్‌లోడింగ్‌లో ఎలాంటి ఆలస్యం జరగకుండా ప్రాధాన్యత ఇస్తున్నట్లు నౌకాయాన మంత్రిత్వ శాఖ ప్రత్యేక కార్యదర్శి రాజేష్ కుమార్ సిన్హా తెలిపారు.
అదేవిధంగా, యూఏఈ నుండి 81,000 టన్నుల ముడిచమురుతో వస్తున్న ‘జగ్ లాడ్కి’ అనే మరో భారతీయ నౌక కూడా సురక్షితంగా భారత్ వైపు వస్తోంది. ప్రస్తుతం పర్షియన్ గల్ఫ్ ప్రాంతంలో 22 భారతీయ నౌకలు, 611 మంది నావికులు ఉన్నారని, వారంతా సురక్షితంగా ఉన్నారని మంత్రిత్వ శాఖ ధృవీకరించింది.