మహదేవ్‌నగర్‌లో సోమవారం తెల్లవారుజామున సుమారు 3:15 గంటల సమయంలో ద్విచక్ర వాహనంపై వచ్చిన ముగ్గురు గుర్తుతెలియని దుండగులు, ఓ దుకాణం షట్టర్‌ను బలవంతంగా తెరిచి పెట్రోల్ పోసి నిప్పంటించారు.
ఈ ఘటన మొత్తం అక్కడి సీసీటీవీ (CCTV) కెమెరాలో స్పష్టంగా రికార్డైంది. ఇద్దరు వ్యక్తులు దుకాణంపై పెట్రోల్ పోసి నిప్పు పెట్టగా, మూడో వ్యక్తి ఎవరైనా వస్తే తప్పించుకునేందుకు బైక్‌ను స్టార్ట్‌ చేసి సిద్ధంగా ఉంచాడు.
మంటలు భారీగా ఎగసిపడటం చూసి స్థానిక ప్రజలు, వ్యాపారులు తీవ్ర భయాందోళనలకు గురయ్యారు. ఆ తర్వాత మంటలను అదుపులోకి తీసుకొచ్చారు. ఈ దుశ్చర్య కారణంగా దుకాణ యజమానికి సుమారు రూ. 4 లక్షల నుంచి రూ. 5 లక్షల వరకు ఆస్తి నష్టం వాటిల్లి ఉండవచ్చని పోలీసులు అంచనా వేస్తున్నారు.
ఈ ఘటనపై మంజరి పోలీసులు భారతీయ న్యాయ సంహిత (BNS) సెక్షన్ 326 కింద కేసు నమోదు చేశారు. నేరస్థుల వివరాలు, ఈ చర్యకు గల కారణాలు ఇంకా తెలియరాలేదు. సీసీటీవీ ఫుటేజీ ఆధారంగా నిందితులను, వారు ఉపయోగించిన వాహనాన్ని గుర్తించేందుకు పోలీసులు ముమ్మర దర్యాప్తు చేస్తున్నారు.