ప్రస్తుతం ప్రపంచ పటాన్ని గమనిస్తే మధ్యప్రాచ్యంలో రగులుతున్న యుద్ధం తగ్గే సూచనలు కనిపించడం లేదు. ఇజ్రాయెల్, ఇరాన్ మరియు అమెరికా మధ్య నెలకొన్న ఉద్రిక్తతల వల్ల ప్రపంచ మార్కెట్లో అనేక వస్తువుల ధరలు పెరిగే అవకాశం ఉంది. అయితే, ఈ యుద్ధ వాతావరణం వల్ల రాబోయే రోజుల్లో కండోమ్‌ల ధరలు కూడా పెరగవచ్చని వింటే మీరు ఆశ్చర్యపోతారు.
యుద్ధానికి, కండోమ్‌లకు సంబంధం ఏంటని మీరు ఆలోచిస్తున్నారా? సాధారణంగా మనం కండోమ్‌లను కేవలం లైంగిక ఆరోగ్యంతోనే ముడిపెడతాము. కానీ సైనిక వ్యూహాల్లో (Military Strategy) కండోమ్ అనేది కేవలం గర్భనిరోధకం మాత్రమే కాదు, సైనికులకు ఒక ‘బ్రహ్మాస్త్రం’ లాంటిది. యుద్ధభూమిలో కండోమ్ చేసే ఇతర పనులేంటో ఇప్పుడు తెలుసుకుందాం.
1. ఆయుధాలకు రక్షణ కవచం: యుద్ధభూమిలో సైనికుడికి అతిపెద్ద తోడు అతని రైఫిల్. అయితే ఎడారిలోని ఇసుక, ధూళి లేదా వర్షం వల్ల తేమ చేరి రైఫిల్ గొట్టం (Muzzle) లోపల చెత్త పేరుకుపోయి అది పాడైపోయే ప్రమాదం ఉంది. అటువంటప్పుడు సైనికులు రైఫిల్ నోటి భాగానికి కండోమ్ తొడుగుతారు. ఇది ఎంత పల్చగా ఉంటుందంటే, అత్యవసర సమయంలో కండోమ్‌ను తొలగించకుండానే కాల్పులు జరపవచ్చు. దీనివల్ల షూటింగ్ నాణ్యతపై ఎటువంటి ప్రభావం ఉండదు.
2. ముఖ్యమైన వస్తువులను పొడిగా ఉంచడానికి: రణరంగంలో మ్యాపులు, బ్యాటరీలు, అగ్గిపెట్టెలు మరియు కమ్యూనికేషన్ పరికరాలను భద్రంగా ఉంచుకోవడం ప్రాణసంకటమైన విషయం. భారీ వర్షంలో లేదా నదులను దాటేటప్పుడు ఈ వస్తువులు తడిస్తే ప్రమాదం. కండోమ్‌లు వాటర్‌ప్రూఫ్ మరియు సాగే గుణం కలిగి ఉండటం వల్ల సైనికులు ఈ వస్తువులను కండోమ్‌లలో ప్యాక్ చేస్తారు. దీనివల్ల నీటిలో ఉన్నా లోపలి వస్తువులు తడవకుండా ఉంటాయి.
3. భారత నౌకాదళం చేసిన ఆ చారిత్రాత్మక ప్రయోగం: కండోమ్‌ల వినియోగం కేవలం నేల మీద మాత్రమే కాదు, నీటిలో కూడా ప్రభావవంతంగా నిరూపితమైంది. 1971 భారత-పాకిస్థాన్ యుద్ధ సమయంలో భారత నౌకాదళం ఒక వినూత్న ఆలోచన చేసింది. ‘లింపెట్ మైన్స్’ (Limpet Mines) ను వాటర్‌ప్రూఫ్ చేయడానికి కండోమ్‌లను ఉపయోగించారు. దీనివల్ల పేలుడు పదార్థాల టైమింగ్ మెకానిజం నీటిలో కూడా తడవకుండా పనిచేసింది, తద్వారా భారత నౌకాదళం విజయవంతంగా ఆ ఆపరేషన్‌ను పూర్తి చేయగలిగింది.
4. ప్రథమ చికిత్స మరియు వైద్య అవసరాలు: ప్రత్యక్ష యుద్ధం జరుగుతున్నప్పుడు తరచుగా వైద్య సాగ్రి కొరత ఏర్పడుతుంది. అటువంటి అత్యవసర సమయాల్లో కండోమ్‌లను ఎమర్జెన్సీ గ్లౌజులుగా లేదా గాయాలపై వాటర్‌ప్రూఫ్ కవర్‌గా ఉపయోగిస్తారు. దీనివల్ల గాయాల్లోకి క్రిములు చేరవు మరియు ఇన్ఫెక్షన్ ముప్పు తగ్గుతుంది.
ముగింపు: మనం ఏ వస్తువునైతే కేవలం ఒకే కోణంలో చూస్తామో, అదే వస్తువు యుద్ధభూమిలో సైనికుల ప్రాణాలను కాపాడటానికి మరియు ఆయుధాలను రక్షించుకోవడానికి మల్టీపర్పస్ టూల్‌గా ఉపయోగపడుతుంది. అందుకే యుద్ధం మొదలైనప్పుడు కండోమ్‌ల సరఫరాలో అంతరాయం ఏర్పడి, ధరలు పెరగడం మొదలవుతాయి.