బ్రెజిల్‌లోని సావో పాలో నగర ఉత్తర ప్రాంతంలో కత్తితో తిరుగుతున్న ఓ మహిళను విధుల్లో ఉన్న పోలీసు అధికారి తుపాకీతో కాల్చిన ఘటన తీవ్ర కలకలం రేపింది. ఈ ఘటనలో తీవ్రంగా గాయపడిన మహిళ అక్కడికక్కడే ప్రాణాలు కోల్పోయింది.
సంఘటన జరిగిన సమయంలో ఆ మహిళ చేతిలో పదునైన కత్తి ఉన్నట్లు సమాచారం. ఆమె ప్రవర్తనతో స్థానిక ప్రజలు, పోలీసులు భయాందోళనలకు గురైనట్లు కథనాలు పేర్కొన్నాయి.
పరిస్థితిని అదుపులోకి తీసుకురావడానికి ప్రయత్నించిన సమయంలో.. ఆ మహిళ అకస్మాత్తుగా కత్తితో తనవైపు దూసుకొచ్చిందని, దీంతో తన రక్షణ కోసం పోలీసు అధికారి తుపాకీతో కాల్పులు జరిపినట్లు సమాచారం.
కాల్పుల్లో మహిళ మృతి.. పోలీసు అరెస్ట్!
పోలీసు జరిపిన కాల్పుల్లో తీవ్రంగా గాయపడిన మహిళ ప్రాణాలు విడిచింది. ఈ ఘటనపై సమాచారం అందుకున్న ఉన్నతాధికారులు వెంటనే అక్కడికి చేరుకుని విచారణ చేపట్టారు.
విచారణ అనంతరం, మహిళ మృతికి సంబంధించి కాల్పులు జరిపిన పోలీసు అధికారిని అరెస్ట్ చేసినట్లు కథనం వెల్లడించింది. ఆయనపై హత్య కేసు నమోదు చేసి జైలుకు తరలించినట్లు పేర్కొంది.
ప్రజల భద్రతను కాపాడాల్సిన పోలీసే కాల్పులు జరపడం, ఆ తర్వాత ఆయనే అరెస్టు కావడం ఈ ఘటనపై మరింత చర్చకు దారితీసింది. ప్రస్తుతం ఈ ఘటనకు సంబంధించిన పూర్తి వివరాలపై బ్రెజిల్ పోలీసులు దర్యాప్తు కొనసాగిస్తున్నారు.
Leave a Reply