ఉత్తరప్రదేశ్లోని కరేలి పోలీస్ స్టేషన్ పరిధిలోని ‘చాట్ వాలీ గల్లీ’లో హృదయవిదారక ఘటన చోటుచేసుకుంది. తన భార్యతో కొడుకు అక్రమ సంబంధం పెట్టుకున్నాడనే అనుమానంతో 45 ఏళ్ల వ్యక్తి తన 20 ఏళ్ల కుమారుడిని హత్య చేశాడు.
ప్రయాగ్రాజ్లో జరిగిన ఈ సంఘటన స్థానికులను తీవ్ర దిగ్భ్రాంతికి గురిచేసింది. పోలీసులు కేసు నమోదు చేసి దర్యాప్తు ప్రారంభించగా, విచారణలో విస్తుపోయే నిజాలు వెలుగుచూస్తున్నాయి.
నిద్రపోతుండగా దాడి: పోలీసులు తెలిపిన వివరాల ప్రకారం.. నిందితుడు దినేష్ చంద్ర జైస్వాల్ (పప్పు), శుక్రవారం రాత్రి భోజనం ముగించుకుని కుటుంబ సభ్యులందరూ ఇంటి మేడపై నిద్రపోతున్న సమయంలో ఈ ఘాతుకానికి పాల్పడ్డాడు. తన కొడుకు ప్రియాన్షును జ్యూసర్ హ్యాండిల్తో అతి దారుణంగా కొట్టి చంపాడు.
ప్రియాన్షు అరుపులు విన్న అతని తల్లి, తమ్ముళ్లు కిందికి వచ్చి చూసేసరికి అతడు రక్తపు మడుగులో పడి ఉన్నాడు. నిందితుడు రక్తంతో తడిచిన ఆయుధంతో అక్కడే నిలబడి ఉన్నాడు. కుటుంబ సభ్యులను బెదిరించి అక్కడి నుండి పరారయ్యాడు.
మద్యానికి బానిసైన తండ్రి: మద్యానికి బానిసైన నిందితుడు చాలా కాలంగా తన భార్య ప్రవర్తనపై అనుమానం పెంచుకున్నాడని పోలీసులు తెలిపారు. తరచుగా ఆమెకు వేరే వారితో సంబంధాలు ఉన్నాయని గొడవపడేవాడు. సంఘటన జరిగిన రాత్రి కూడా ఇదే విషయంలో దంపతుల మధ్య వాగ్వాదం జరిగినట్లు తెలుస్తోంది.
పోలీసుల వెల్లడి: సమాచారం అందుకున్న డీసీపీ మనీష్ కుమార్ శాండిల్య మరియు ఇతర ఉన్నతాధికారులు ఫోరెన్సిక్ బృందంతో కలిసి సంఘటన స్థలాన్ని పరిశీలించారు. తన భార్యతో కొడుకే అక్రమ సంబంధం కలిగి ఉన్నాడనే వికృత అనుమానమే ఈ హత్యకు దారితీసిందని డీసీపీ ధృవీకరించారు. నిందితుడిపై ఎఫ్ఐఆర్ (FIR) నమోదు చేసి, కఠిన చర్యలు తీసుకునేందుకు పోలీసులు సిద్ధమవుతున్నారు.