న్యూఢిల్లీ: పశ్చిమ బెంగాల్‌కు చెందిన స్పెషల్ ఇంటెన్సివ్ రివిజన్ (SIR) కేసులో సుప్రీంకోర్టు సీజేఐ సూర్యకాంత్ బెంచ్ ముందు వాడివేడి చర్చ జరిగింది. సీనియర్ న్యాయవాది కపిల్ సిబల్ వాదిస్తూ.. పత్రాలను అప్‌లోడ్ చేయడానికి గడువును ఫిబ్రవరి 21 వరకు పొడిగించారని, కానీ ఫిబ్రవరి 15 నుండే అప్‌లోడింగ్ నిలిపివేశారని, ప్రస్తుతం క్షేత్రస్థాయిలో ఇదే జరుగుతోందని పేర్కొన్నారు.
దీనిపై సీజేఐ సూర్యకాంత్ స్పందిస్తూ.. “మీరు ఏ ఉత్తర్వుల గురించి ప్రస్తావిస్తున్నారు?” అని సిబల్‌ను అడ్డుకున్నారు. ఫిబ్రవరి 9 నాటి ఉత్తర్వుల్లోని 6వ పేరాను సిబల్ కోర్టుకు గుర్తు చేశారు. అనంతరం సీజేఐ కఠినంగా స్పందిస్తూ.. కోర్టు ఆదేశాల అమలును దశలవారీగా చూపాలని ఆదేశించారు. గ్రూప్ ‘బి’ అధికారులకు బదులుగా గ్రూప్ ‘ఎ’ అధికారుల లభ్యతపై స్థితిగతులేమిటని ప్రశ్నించారు. ఎన్నికల కమిషన్‌కు తగినంత మంది ఈఆర్వోలు (Electoral Registration Officers) దొరికారా? అని నిలదీశారు.
కోర్టు అసహనం – ‘ట్రస్ట్ డెఫిసిట్’: కోర్టు ఆదేశాలను పాటించడంలో పశ్చిమ బెంగాల్ ప్రభుత్వం చూపుతున్న ఉదాసీనతపై సీజేఐ తీవ్ర అసహనం వ్యక్తం చేశారు. “మా ఉత్తర్వులు ఉన్నప్పటికీ ఇలా జరగడం నిరాశాజనకం” అని వ్యాఖ్యానించారు. రాష్ట్ర ప్రభుత్వం మరియు ఎన్నికల కమిషన్ మధ్య ‘ట్రస్ట్ డెఫిసిట్’ (నమ్మక లోపం) ఉందని కోర్టు పేర్కొంది.
కీలక నిర్ణయాలు:
- ఎస్ఐఆర్ (SIR) ప్రక్రియ సజావుగా సాగడానికి న్యాయాధికారులను నియమించాలని కోర్టు ఆదేశించింది.
- ప్రస్తుత మరియు మాజీ జిల్లా జడ్జి స్థాయి అధికారులను ఈ విధులకు అందుబాటులో ఉంచాలని కలకత్తా హైకోర్టు చీఫ్ జస్టిస్‌ను కోరింది.
- న్యాయాధికారులకు సహాయంగా మైక్రో అబ్జర్వర్లను మరియు రాష్ట్ర ప్రభుత్వ అధికారులను నియమించనున్నారు.
- పశ్చిమ బెంగాల్ డీజీపీని ‘యాక్షన్ టేకెన్ రిపోర్ట్’ సమర్పించాలని మరియు అదనపు అఫిడవిట్ దాఖలు చేయాలని కోర్టు ఆదేశించింది. ఈ కేసు తదుపరి విచారణ మార్చి మొదటి వారంలో జరగనుంది.