ఇంటి కరెంట్ బిల్లును చూసి బెంబేలెత్తిపోతున్న సామాన్యులకు కేంద్ర ప్రభుత్వం అందిస్తున్న ‘పీఎం సూర్య ఘర్ ఉచిత విద్యుత్ యోజన’ ఒక గొప్ప ఉపశమనం.
ఇళ్లపై రూఫ్టాప్ సోలార్ సిస్టమ్స్ (Rooftop Solar Systems) ఏర్పాటు చేసుకోవడం ద్వారా ప్రతి నెలా 300 యూనిట్ల వరకు ఉచిత విద్యుత్ను ఈ పథకం అందిస్తుంది. మనలో చాలా మందికి సోలార్ ప్లాంట్ ఏర్పాటు చేయడం చాలా ఖర్చుతో కూడుకున్న వ్యవహారమనే అభిప్రాయం ఉంది. అయితే, ఈ పథకం ద్వారా సోలార్ ప్యానెల్స్ అమర్చుకోవడానికి ఎంత ఖర్చవుతుంది? మనం పెట్టిన పెట్టుబడి ఎన్ని రోజుల్లో తిరిగి వస్తుంది? దీని ఆర్థిక లెక్కలు ఎలా ఉంటాయో ఇప్పుడు చూద్దాం..
భారీగా సబ్సిడీ లభిస్తుంది
భారతదేశంలో ప్రస్తుతం 1 కిలోవాట్ (1 kW) సోలార్ సిస్టమ్ ఏర్పాటు చేయడానికి సబ్సిడీకి ముందు సుమారు రూ. 60,000 నుండి రూ. 80,000 వరకు ఖర్చవుతుంది. అయితే పీఎం సూర్య ఘర్ పథకం కింద కేంద్ర ప్రభుత్వం భారీ మొత్తాన్ని సబ్సిడీ రూపంలో అందిస్తోంది.
1 kW సిస్టమ్: రూ. 30,000 వరకు సబ్సిడీ
2 kW సిస్టమ్: రూ. 60,000 వరకు సబ్సిడీ
3 kW సిస్టమ్: రూ. 78,000 వరకు సబ్సిడీ
3 కిలోవాట్ కంటే ఎక్కువ సామర్థ్యం ఉన్న సిస్టమ్స్కు కూడా గరిష్ట సబ్సిడీ మొత్తాన్ని రూ. 78,000 గానే నిర్ణయించారు. సిస్టమ్ పరిమాణాన్ని బట్టి మొత్తం ఖర్చులో 40% నుండి 60% వరకు సబ్సిడీ లభిస్తుంది. సోలార్ ప్యానెల్స్ అమర్చి, అధికారులు తనిఖీ పూర్తి చేసిన వెంటనే సబ్సిడీ మొత్తం నేరుగా లబ్ధిదారుని బ్యాంక్ ఖాతాలో జమ చేయబడుతుంది.
పెట్టిన పెట్టుబడి ఎప్పుడు తిరిగి వస్తుంది?
సోలార్ కోసం మీరు పెట్టే పెట్టుబడిని కరెంట్ బిల్లు ఆదా రూపంలో ఎన్ని సంవత్సరాలలో తిరిగి పొందవచ్చు అనేది ప్రధానంగా మూడు అంశాలపై ఆధారపడి ఉంటుంది. మొదటిది మీ ప్రస్తుత ఇంటి విద్యుత్ బిల్లు, రెండవది మీ ప్రాంతంలో లభించే సూర్యరశ్మి తీవ్రత (ఎండ ఎక్కువగా ఉండే ప్రాంతాల్లో పెట్టుబడి త్వరగా తిరిగి వస్తుంది), మూడవది మీరు ఏర్పాటు చేసుకునే సోలార్ సిస్టమ్ పరిమాణం.
ఒక చిన్న ఉదాహరణతో చూద్దాం:
ఒక కుటుంబం 3 kW సోలార్ సిస్టమ్ ఏర్పాటు చేయడానికి రూ. 1.8 లక్షలు ఖర్చు చేసిందని అనుకుందాం. కేంద్ర ప్రభుత్వ సబ్సిడీ రూ. 78,000 మినహాయిస్తే, ఆ కుటుంబం సొంతంగా పెట్టుబడి పెట్టిన మొత్తం రూ. 1.08 లక్షలు అవుతుంది. ఆ ఇల్లు నెలకు సగటున 900 యూనిట్ల విద్యుత్ను వినియోగిస్తూ, యూనిట్కు రూ. 8 చొప్పున సగటున రూ. 7,200 బిల్లు కడుతోంది అనుకుందాం.
ఒక 3 kW సోలార్ సిస్టమ్ నెలకు 250 నుండి 300 యూనిట్ల విద్యుత్ను ఉత్పత్తి చేయగలదు. మనం సగటున 275 యూనిట్ల ఉత్పత్తిని లెక్కలోకి తీసుకున్నా.. నెలకు బిల్లులో రూ. 2,200 ఆదా అవుతుంది. ఏడాదికి ఇది దాదాపు రూ. 26,400 అవుతుంది. ఈ లెక్కన, కేవలం 4 సంవత్సరాల 1 నెలలోనే (రూ. 26,400 x 4 ఏళ్ల 1 నెల = రూ. 1.08 లక్షలు) సోలార్ ఏర్పాటు కోసం జేబులోంచి పెట్టిన రూ. 1.08 లక్షల పెట్టుబడి పూర్తిగా తిరిగి వస్తుంది. ఆపై వచ్చే దాదాపు 20 ఏళ్లకు పైగా ఉచిత విద్యుత్ మన సొంతమవుతుంది.