పాట్నా: బీహార్ రాష్ట్రం నౌబత్పూర్ పోలీస్ స్టేషన్ పరిధిలోని ఒక వివాహ వేడుకలో ప్రదర్శన ఇవ్వడం కోసం ఇద్దరు మహిళా డ్యాన్సర్లను నిర్వాహకులు పిలిపించారు.
ఆ వేడుకలో ఉన్న మున్నా కుమార్ అనే వ్యక్తి, ఆ మహిళలను తుపాకీ మునై బెదిరించి బలవంతంగా వాహనంలో కిడ్నాప్ చేసి నిర్జన ప్రదేశానికి తీసుకెళ్లాడు. ఆ తర్వాత అక్కడ వేచి ఉన్న ఒక ఉన్మాదుల ముఠాకు ఆ మహిళలను అప్పగించినట్లు తెలుస్తోంది.
అక్కడ ఆ ఇద్దరు మహిళలపై దాదాపు 13 మంది దుండగుల ముఠా అత్యంత క్రూరమైన పద్ధతిలో సామూహిక లైంగిక దాడికి (గ్యాంగ్ రేప్) పాల్పడింది. రాత్రంతా ఆ మహిళలపై ఈ అఘాయిత్యం కొనసాగింది. మరుసటి రోజు ఉదయం, ఆ ముఠా బాధితులను ఒక వాహనంలో ఎక్కించి వేరే ప్రాంతానికి తరలించేందుకు ప్రయత్నించింది.
బాధితుల ఆర్తనాదాలు – ప్రజల అప్రమత్తత:
ఆ వాహనం రోడ్డుపై వెళ్తున్న సమయంలో, ఎలాగైనా తమను కాపాడాలంటూ ఆ ఇద్దరు మహిళలు వాహనం లోపలి నుండి గట్టిగా కేకలు వేశారు. వారి ఆర్తనాదాలు విన్న స్థానిక ప్రజలు వెంటనే అప్రమత్తమై, సదరు వాహనాన్ని అడ్డుకుని వారిని రక్షించేందుకు ప్రయత్నించారు. అదే సమయంలో పోలీసులకు కూడా సమాచారం అందించారు.
ప్రజలు వాహనాన్ని చుట్టుముట్టే లోపే నిందితులు అక్కడి నుండి పరారయ్యారు. సమాచారం అందుకున్న పోలీసులు సంఘటనా స్థలానికి చేరుకుని బాధితులను రక్షించి వైద్య పరీక్షల నిమిత్తం ఆసుపత్రికి తరలించారు. ఈ ఘోర ఘటనపై కేసు నమోదు చేసిన పోలీసులు, పరారీలో ఉన్న నిందితుల కోసం ప్రత్యేక బృందాలతో తీవ్రంగా గాలిస్తున్నారు.