కాన్పూర్లో కవల కుమార్తెల హత్య కేసులో ఊహించని మలుపులు వెలుగులోకి వచ్చాయి. చండీగఢ్కు చెందిన ఒక మహిళతో తండ్రికి ఉన్న స్నేహం వల్ల ఆ ఇంట్లో కలహాలు మొదలయ్యాయని, ఆ గొడవలే చివరికి చిన్నారుల ప్రాణాలు తీశాయని తెలుస్తోంది.
విడివిడి గదులు.. విడిపోయిన పిల్లలు! కాన్పూర్ కిద్వాయ్ నగర్లోని త్రిమూర్తి అపార్ట్మెంట్లో జరిగిన ఈ జంట హత్యల వెనుక తండ్రి శశిరంజన్ ప్రధాన నిందితుడు. పోలీసు విచారణలో తేలిందేమిటంటే.. శశిరంజన్ మరియు అతని భార్య రేష్మ మధ్య గత కొంతకాలంగా తీవ్ర వివాదాలు నడుస్తున్నాయి. వారు ఒకే ఇంట్లో ఉన్నప్పటికీ, ఎవరి గదులు వారివిగా విడివిడిగా ఉంటున్నారు. పిల్లలను కూడా వారు తమ మధ్య అనధికారికంగా పంచుకున్నారు.
ఈ గొడవలకు ప్రధాన కారణం చండీగఢ్కు చెందిన ఒక మహిళతో శశిరంజన్ కొనసాగిస్తున్న సంబంధమని సమాచారం. పాండమిక్ సమయంలో పని నిమిత్తం చండీగఢ్ వెళ్లిన శశిరంజన్, అక్కడ ఒక మహిళతో స్నేహం పెంచుకున్నాడని భార్య రేష్మ తెలిపారు. పని నెపంతో తరచుగా అక్కడికి వెళ్తూ రోజుల తరబడి ఉండటంతో ఇంట్లో ఉద్రిక్తతలు పెరిగాయి.
పిల్లలపై కఠిన ఆంక్షలు: నిందితుడు తన కుమార్తెల పట్ల అత్యంత కఠినంగా వ్యవహరించేవాడని పొరుగువారు చెబుతున్నారు. ఆ చిన్నారులను అపార్ట్మెంట్లోని ఇతర పిల్లలతో ఆడుకోవడానికి కూడా అనుమతించేవాడు కాదు. ఎవరితోనైనా మాట్లాడినా, బయటకు వెళ్లాలని ప్రయత్నించినా వారిని తీవ్రంగా మందలించేవాడు.
కిరాతక హత్య.. అంతా సీసీటీవీలో! శనివారం అర్థరాత్రి 11 ఏళ్ల కవల కుమార్తెలు రిద్ధి మరియు సిద్ధిలను శశిరంజన్ అత్యంత క్రూరంగా చంపాడు. ముందుగా వారికి మత్తుమందు ఇచ్చి, ఆపై ఒక్కొక్కరిని గొంతు నులిమి చంపాడు. వారు తప్పించుకోకుండా ఉండేందుకు సుత్తితో తలపై బలంగా బాదాడు. ఈ దారుణమంతా ఆ గదిలో ఉన్న సీసీటీవీ కెమెరాల్లో రికార్డైంది.
హత్య చేసిన తర్వాత నిందితుడే స్వయంగా పోలీసు కంట్రోల్ రూమ్కు ఫోన్ చేసి సమాచారం అందించాడు. పోలీసులు వచ్చేసరికి బెడ్రూమ్ ఫ్లోర్పై పిల్లల రక్తపు మడుగులో శవాలుగా పడి ఉన్నారు. పక్క గదిలో ఆరేళ్ల కొడుకు రుద్రవ్తో నిద్రిస్తున్న తల్లి రేష్మ, పోలీసుల అరుపులకు నిద్రలేచి చూసేసరికి జరగరాని నష్టం జరిగిపోయింది.
ముందుగానే ప్లాన్ చేసిన నిందితుడు: శశిరంజన్ గత ఐదు రోజుల క్రితమే ఒక ‘చాపర్’ (కత్తి) కొనుగోలు చేసినట్లు పోలీసులు గుర్తించారు, అంటే ఈ హత్యకు అతను కొద్దిరోజులుగా ప్రణాళిక సిద్ధం చేసుకున్నట్లు తెలుస్తోంది. శనివారం రాత్రి టీవీ ఆపేయమని చెప్పినప్పుడు భార్యాపిల్లలు వినలేదని, ఆ కోపంతోనే ఈ ఘాతుకానికి ఒడిగట్టానని నిందితుడు చెబుతున్నప్పటికీ, గొడవలకు అసలు కారణం ఆ చండీగఢ్ మహిళేనని పోలీసులు భావిస్తున్నారు.
ప్రస్తుతం పోలీసులు నిందితుడి మొబైల్ డేటాను విశ్లేషిస్తున్నారు. బీహార్కు చెందిన శశిరంజన్ మరియు రేష్మలు 2014లో ప్రేమ వివాహం చేసుకున్నారు. ఒక ఫార్మా కంపెనీలో సేల్స్ మేనేజర్గా పనిచేస్తున్న వ్యక్తి, తన కన్నబిడ్డలనే ఇలా కిరాతకంగా చంపడం స్థానికంగా కలకలం రేపింది. పోలీసులు కేసు నమోదు చేసి తదుపరి విచారణ జరుపుతున్నారు.