తమిళనాడు విరుదునగర్ జిల్లా అరుప్పుకోట్టై సమీపంలోని పాళయంపట్టి అరుంధతియార్ వీధికి చెందిన శాంతి (40) భర్తను కోల్పోయి, గోపాలపురంలో పారిశుద్ధ్య కార్మికురాలిగా పనిచేస్తోంది.
ఘటన జరిగిన రాత్రి శాంతి, ఆమె బంధువు శ్రీదేవి (45), శాంతి కుమారుడు, కుమార్తె ఇంట్లో నిద్రిస్తున్నారు. వేసవి కాలం కావడంతో శాంతి, శ్రీదేవి ఇంటి తలుపులు కొద్దిగా తెరిచి ఉంచి, గుమ్మం దగ్గర పడుకుని నిద్రపోయినట్లు తెలుస్తోంది.
తెల్లవారుజామున 3 గంటల ప్రాంతంలో వీరిద్దరూ గాఢనిద్రలో ఉండగా, అక్కడికి వచ్చిన ఒక అపరిచిత వ్యక్తి అకస్మాత్తుగా వారిపై పెట్రోల్ పోశాడు. వారు తేరుకుని లేచేలోపే ఆ వ్యక్తి నిప్పు అంటించి అక్కడ నుండి పరారయ్యాడు. శాంతి, శ్రీదేవి ఇద్దరి శరీరాలకు మంటలు అంటుకుని వేగంగా వ్యాపించాయి. వారి ఆర్తనాదాలు విన్న శాంతి కుమారుడు సందీప్కుమార్ (16) పరుగున వచ్చి, మంటలను ఆర్పి వారిద్దరినీ రక్షించి బయటకు తీసుకువచ్చాడు. తీవ్రంగా గాయపడిన వారిద్దరినీ వెంటనే అరుప్పుకోట్టై, విరుదునగర్ ప్రభుత్వ ఆసుపత్రుల్లో చికిత్స నిమిత్తం చేర్పించారు.
ఈ ఘోర ఘటనపై సమాచారం అందుకున్న జిల్లా పోలీస్ సూపరింటెండెంట్ శ్రీ నాథ్, అడిషనల్ పోలీస్ సూపరింటెండెంట్ కరుప్పయ్య సంఘటనా స్థలాన్ని పరిశీలించి విచారణ చేపట్టారు. వేలిముద్రల నిపుణుల ద్వారా ఆధారాలు సేకరించగా, పోలీసుల ప్రాథమిక విచారణలో కరియాపట్టి సమీపంలోని కల్కురిచ్చికి చెందిన ముత్తు (60) అనే వృద్ధుడే మహిళలపై పెట్రోల్ పోసి నిప్పు పెట్టినట్లు తేలింది. దీనిపై ప్రత్యేక పోలీసు బృందం ముత్తును అరెస్ట్ చేసి, ఈ ఘటన పాత కక్షల వల్ల జరిగిందా లేదా మరేదైనా కారణం ఉందా అనే కోణంలో ముమ్మరంగా విచారిస్తున్నారు. ఈ ఘటన స్థానికంగా తీవ్ర కలకలం రేపింది.