“కాఫీ మేకర్ మెషిన్ 10 రోజుల్లో 1 TB డేటాను పంపిందా.? ఇంట్లోని కాఫీ మెషిన్ చూసి షాక్ తిన్న టెక్ నిపుణుడు.! ఎందుకింత డేటా బదిలీ.? వెంటనే వైఫైని ఎందుకు డిస్‌కనెక్ట్ చేశారు.?

ఇంట్లో కాఫీ తయారు చేయడానికి ఉపయోగించే ఒక మెషిన్, కేవలం 10 రోజుల్లో సుమారు 1 టెరాబైట్ (TB) పరిమాణంలో డేటా బదిలీ (Data Transfer) చేసినట్లు ఒక సాంకేతిక నిపుణుడు వెల్లడించిన సమాచారం సోషల్ మీడియాలో చర్చనీయాంశంగా మారింది.

ఈ ఘటన ఏ దేశంలో జరిగిందనే వివరాలను సదరు నిపుణుడు తన పోస్ట్‌లో స్పష్టంగా పేర్కొనలేదు. తన తల్లిదండ్రులు కొత్తగా కొనుగోలు చేసిన క్యూరిగ్ (Keurig) స్మార్ట్ కాఫీ మెషిన్ ఇంటర్నెట్ కార్యకలాపాలను పర్యవేక్షించినప్పుడు ఈ అసాధారణమైన డేటా బదిలీని గమనించినట్లు ఆయన తెలిపారు.

క్యూరిగ్ స్మార్ట్ కాఫీ మెషిన్ 2.4 గిగాహెర్ట్జ్ వైఫై కనెక్షన్‌తో పనిచేస్తుంది. తన ఇంటి ఇంటర్నెట్ నెట్‌వర్క్ వివరాలను తనిఖీ చేసినప్పుడు, ఆ మెషిన్ సాధారణం కంటే చాలా ఎక్కువ మొత్తంలో డేటా బదిలీని సృష్టించినట్లు సదరు టెక్ నిపుణుడు గుర్తించారు. సుమారు 10 రోజుల్లో ఈ డేటా పరిమాణం 1 టెరాబైట్‌కు చేరుకుందని ఆయన సోషల్ మీడియా వేదిక ‘ఎక్స్’ (X) లో పోస్ట్ చేశారు. దీనితో, భద్రత మరియు నెట్‌వర్క్ సమస్యలను నివారించేందుకు వెంటనే ఆ మెషిన్ వైఫై కనెక్షన్‌ను డిస్‌కనెక్ట్ చేశారు.

అయితే ఈ ఘటన డేటా చోరీ జరిగిందని ధృవీకరించలేదు. సదరు టెక్ నిపుణుడి వివరణ ప్రకారం, ఇది ఆ మెషిన్ యొక్క నిర్దిష్ట పరికరంలో సంభవించిన సాఫ్ట్‌వేర్ లోపం (Software Bug) కావచ్చు. అంతేకాకుండా, బదిలీ అయిన డేటాలో ఎక్కువ భాగం లోకల్ నెట్‌వర్క్‌ను దాటి బయటి ఇంటర్నెట్‌కు వెళ్లలేదని కూడా ఆయన పేర్కొన్నారు. అయినప్పటికీ, అధిక డేటా ప్రవాహం కారణంగా ఆయన ఇంటి వైఫై రౌటర్ పనితీరు కూడా ప్రభావితమైనట్లు తెలుస్తోంది.

ఈ పోస్ట్ ఇంటర్నెట్‌లో వైరల్ కావడంతో, కాఫీ తయారు చేసే మెషిన్‌కు ఇన్ని వివరాల డేటా బదిలీ ఎందుకు అవసరమని చాలా మంది ప్రశ్నించడం ప్రారంభించారు. కొందరు స్మార్ట్ పరికరాలకు అనవసరమైన ఇంటర్నెట్ కనెక్షన్లు ఇవ్వడంపై సందేహాలు వ్యక్తం చేశారు. ఇంటర్నెట్‌తో అనుసంధానించబడే ప్రతి స్మార్ట్ పరికరం సురక్షితంగా మరియు సరిగ్గా పనిచేస్తుందో లేదో తనిఖీ చేసుకోవడం చాలా అవసరమని ఈ ఘటన గుర్తుచేస్తోంది.