గురుగ్రామ్: తన కాబోయే భార్యను కలవబోతున్నానన్న ఉత్సాహంలో ఉన్న ఒక యువకుడు, లైంగిక సామర్థ్యం పెంచే మాత్రలను అతిగా (Overdose) సేవించడంతో గుండెపోటు వచ్చి మరణించిన షాకింగ్ ఘటన హర్యానాలోని గురుగ్రామ్లో చోటుచేసుకుంది.
మృతుడిని నాగ్పూర్ నివాసి రోహిత్ లాల్ (29)గా గుర్తించారు. ఇతను ఢిల్లీలోని ‘క్వాలిటీ కౌన్సిల్ ఆఫ్ ఇండియా’ కార్యాలయంలో ఉద్యోగిగా పనిచేస్తూ, గురుగ్రామ్ సెక్టార్ 53లోని ఒక పీజీలో అద్దెకు ఉంటున్నాడు.
ఘటన నేపథ్యం: గురువారం ఉదయం ఈ ఘటన వెలుగులోకి వచ్చింది. రోహిత్ మరియు అతని సహోద్యోగి ప్రతిరోజూ కలిసి ఆఫీస్కు వెళ్లేవారు. అయితే ఆ రోజు రోహిత్ ఎన్నిసార్లు కాల్ చేసినా ఫోన్ ఎత్తలేదు, అటు గది తలుపులు కూడా తీయలేదు. దీనితో అనుమానం వచ్చిన సహోద్యోగి వెంటనే పోలీసులకు సమాచారం ఇచ్చారు. పోలీసులు అక్కడికి చేరుకుని తలుపులు పగులగొట్టి లోపలికి వెళ్లగా, రోహిత్ బెడ్ మీద శవమై కనిపించాడు.
మితిమీరిన మాత్రల సేవనమే కారణమా? పోలీసులు గదిని తనిఖీ చేయగా, కొన్ని లైంగిక ప్రేరేపిత మాత్రల ఖాలీ ప్యాకెట్లు మరియు హెల్త్ సప్లిమెంట్లు లభించాయి. ప్రాథమిక విచారణ ప్రకారం, రోహిత్ ఆ రోజు తన నిశ్చిత వధువును కలవడానికి ఆహ్వానించాడు. ఆమె రాక కోసం ఎదురుచూస్తున్న రోహిత్, లైంగిక సామర్థ్యం పెంచుకోవాలనే ఉద్దేశంతో ఆ మాత్రలను వేసుకున్నట్లు తెలుస్తోంది. అయితే, ఈ మాత్రలను మోతాదుకు మించి సేవించడం వల్ల తీవ్రమైన గుండెపోటు సంభవించి అతను మరణించి ఉండవచ్చని పోలీసులు అనుమానిస్తున్నారు.
FSL నివేదిక కోసం నిరీక్షణ: “ఘటనా స్థలంలో దొరికిన మందులు మరియు మృతుడి విసెరా (Viscera) నమూనాలను ఫోరెన్సిక్ సైన్స్ లాబొరేటరీ (FSL)కి పంపాము. నివేదిక వచ్చిన తర్వాతే మరణానికి గల ఖచ్చితమైన కారణం తెలుస్తుంది. ప్రస్తుతం ఇది ఔషధాల ఓవర్డోస్ వల్ల జరిగిన మరణంగానే కనిపిస్తోంది” అని సెక్టార్ 53 ఎస్ హెచ్ ఓ సత్యేంద్ర రావల్ తెలిపారు.
పోస్ట్మార్టం అనంతరం మృతదేహాన్ని కుటుంబ సభ్యులకు అప్పగించారు. ఈ ఘటన యువతలో ఆందోళన కలిగించడమే కాకుండా, వైద్యుల సలహా లేకుండా ఇలాంటి మాత్రలు వాడటం ఎంత ప్రమాదకరమో హెచ్చరిస్తోంది.