వాహన ప్రియులకు, ముఖ్యంగా మైలేజీ గురించి ఆలోచించే మధ్యతరగతి ప్రజలకు చైనా వాహన తయారీ సంస్థ ‘గీలీ ఆటో’ (Geely Auto) అద్భుతమైన వార్తను మోసుకొచ్చింది. పెట్రోల్ ధరలు మండిపోతున్న ఈ రోజుల్లో.. ఒక లీటర్ పెట్రోల్ పోస్తే ఏకంగా 45 కిలోమీటర్ల మైలేజీని ఇచ్చే సరికొత్త హైబ్రిడ్ వ్యవస్థను గీలీ ఆటో పరిచయం చేసింది. సంప్రదాయ హైబ్రిడ్ కార్ల ప్రపంచంలో ఇది ఒక భారీ మార్పుగా నిపుణులు భావిస్తున్నారు.
మైలేజీలో సరికొత్త ప్రపంచ రికార్డు!
ఇప్పటివరకు హైబ్రిడ్ టెక్నాలజీ అంటే టయోటా వంటి జపాన్ కంపెనీలదే గుత్తాధిపత్యం. కానీ, గీలీ తన కొత్త ‘ఐ-హెచ్ఈవీ’ (i-HEV) ఇంటెలిజెంట్ హైబ్రిడ్ సిస్టమ్తో ఆ రికార్డులను తిరగరాసింది.
- పరీక్షా ఫలితాలు: గీలీకి చెందిన ‘ఎం గ్రాండ్’ మోడల్పై జరిపిన పరీక్షల్లో.. కేవలం 2.22 లీటర్ల ఇంధనంతో 100 కిలోమీటర్ల దూరాన్ని అధిగమించింది. అంటే సగటున లీటరుకు 45 కి.మీ మైలేజీని సాధించి గిన్నిస్ వరల్డ్ రికార్డులో చోటు సంపాదించింది.
- ఖర్చు ఎంతంటే: ఈ మైలేజీతో గనుక లెక్కిస్తే.. ఢిల్లీ నుంచి ముంబై వరకు చేసే సుదీర్ఘ ప్రయాణాన్ని కేవలం రూ. 3,000 పెట్రోల్ ఖర్చుతో పూర్తి చేయవచ్చు!
ఏఐ (AI) తో పనిచేసే స్మార్ట్ ఇంజిన్!
ఈ కారు కేవలం ఇంధనాన్ని ఆదా చేయడమే కాదు, అత్యంత తెలివైనది కూడా.
- రియల్ టైమ్ డేటా: ఇందులో ఏఐ ఆధారిత ఎనర్జీ మేనేజ్మెంట్ ప్లాట్ఫారమ్ ఉంది. ఇది బయటి ఉష్ణోగ్రత, తేమ మరియు రహదారి ఎత్తు పల్లాలను ఎప్పటికప్పుడు విశ్లేషించి శక్తి వినియోగాన్ని నియంత్రిస్తుంది. దీనివల్ల డ్రైవర్ కు ఎటువంటి కష్టమూ లేకుండా కారు అత్యుత్తమ పర్ఫార్మెన్స్ ఇస్తుంది.
జపాన్ కంపెనీలకు గట్టి పోటీ
1997లో టయోటా ప్రియస్ లాంచ్ అయినప్పటి నుండి హైబ్రిడ్ రంగంలో జపాన్ రాజ్యమేలుతోంది. ముఖ్యంగా ఛార్జింగ్ స్టేషన్ల కొరత ఉన్న ప్రాంతాల్లో హైబ్రిడ్ కార్లకు విపరీతమైన డిమాండ్ ఉంది. ఇప్పుడు గీలీ తెచ్చిన ఈ కొత్త టెక్నాలజీతో టయోటా, హోండా వంటి కంపెనీలకు గట్టి సవాల్ ఎదురుకానుంది. గీలీ ఆటో తన పాపులర్ మోడల్స్ అన్నింటిలోనూ ఈ కొత్త టెక్నాలజీని 2026 నాటికి అందుబాటులోకి తీసుకురావాలని లక్ష్యంగా పెట్టుకుంది.