చలికాలంలో పాదాలు చల్లబడటం సహజమే, కానీ అవి ఎప్పుడూ చల్లగా ఉంటున్నాయంటే అది గుండెపోటుకు సంకేతం కావచ్చని మీకు తెలుసా? పాదాల వాపు మరియు రాత్రిపూట వచ్చే తిమ్మిర్లు కేవలం అలసట వల్ల మాత్రమే రావు. అవి మీ శరీరంలోని అంతర్గత అవయవాల పనితీరులో లోపాలను సూచిస్తాయి.
మీ పాదాలు మీకు చెబుతున్న ఆ రహస్యాలేంటో ఇక్కడ చూడండి:
కాళ్ల వాపు (Edema): పాదాలు, మడమలు లేదా చీలమండల వద్ద వాపు కేవలం అలసట వల్ల రాదు. గుండె రక్తాన్ని పంప్ చేసే సామర్థ్యం తగ్గినప్పుడు (హార్ట్ ఫెయిల్యూర్) లేదా మూత్రపిండాలు సరిగ్గా పనిచేయనప్పుడు శరీరంలో ద్రవాలు పేరుకుపోయి వాపుకు దారితీస్తాయి. కాలేయ వ్యాధులు లేదా రక్తనాళాల్లో అడ్డంకులు ఉన్నప్పుడు కూడా ఈ సమస్య కనిపిస్తుంది.
చల్లని పాదాలు: మీ పాదాలు ఎప్పుడూ చల్లగా ఉంటుంటే, అది పెరిఫెరల్ ఆర్టరీ డిసీజ్ (PAD) కావచ్చు. రక్తనాళాల్లో కొవ్వు పేరుకుపోవడం వల్ల కాళ్లకు ఆక్సిజన్ సరఫరా తగ్గి ఇలా జరుగుతుంది. దీనిని నిర్లక్ష్యం చేస్తే గుండెపోటు లేదా స్ట్రోక్ వచ్చే ప్రమాదం ఉంది.
రాత్రిపూట కాళ్ల తిమ్మిర్లు: నిద్రలో అకస్మాత్తుగా కండరాలు పట్టేయడం (Cramps) ఎలక్ట్రోలైట్ అసమతుల్యత లేదా డీహైడ్రేషన్ వల్ల రావచ్చు. కానీ ఇది తరచుగా జరుగుతుంటే రక్త ప్రసరణ సమస్యలు లేదా మూత్రపిండాల వ్యాధికి సంకేతం కావచ్చు.
చర్మం రంగు మారడం లేదా మానని గాయాలు: మీ కాళ్లపై చర్మం ఎరుపు, గోధుమ లేదా ఊదా రంగులోకి మారితే, అది రక్త ప్రసరణ సరిగ్గా లేదని అర్థం. అలాగే చిన్న గాయాలు వారం పది రోజులైనా మానకపోతే, అది మధుమేహం (డయాబెటిస్) లక్షణం కావచ్చు.
తిమ్మిర్లు లేదా సూదులతో పొడిచినట్లు అనిపించడం: కాళ్లలో తిమ్మిర్లు లేదా మంటలు డయాబెటిక్ న్యూరోపతీని సూచించవచ్చు. రక్తంలో చక్కెర స్థాయిలు పెరిగినప్పుడు నరాలు దెబ్బతింటాయి. ఇది భవిష్యత్తులో గుండె జబ్బుల ప్రమాదాన్ని పెంచుతుంది.
అకస్మాత్తుగా ఎర్రబడటం: మీ కాలు అకస్మాత్తుగా ఎర్రబడి వాపు కనిపిస్తే, అది డీప్ వీన్ థ్రాంబోసిస్ (DVT) కావచ్చు. ఇది రక్తనాళాల్లో రక్తం గడ్డకట్టడం వల్ల జరుగుతుంది. ఈ గడ్డలు ఊపిరితిత్తులకు చేరితే ప్రాణాపాయం సంభవించవచ్చు.
(గమనిక: ఈ సమాచారం సాధారణ అవగాహన కోసం మాత్రమే. ఏదైనా ఆరోగ్య సమస్య ఉన్నప్పుడు ఖచ్చితంగా నిపుణులైన వైద్యులను సంప్రదించాలి.)