ప్యాంగ్యాంగ్: ఇరాన్‌పై అమెరికా, ఇజ్రాయెల్ జరుపుతున్న దాడులు ప్రపంచాన్ని వణికిస్తున్నాయి. యుద్ధం మొదలైన మొదటి రోజే ఇరాన్ అత్యున్నత నాయకుడు అయతొల్లా అలీ ఖమేనీని హతమార్చిన అమెరికా, ఇప్పుడు తన తదుపరి లక్ష్యంగా ఉత్తర కొరియా అధ్యక్షుడు కిమ్ జోంగ్ ఉన్‌ను ఎంచుకుందా? అనే చర్చ మొదలైంది.
ప్రస్తుతం డొనాల్డ్ ట్రంప్ అనుసరిస్తున్న ‘డెకాపిటేషన్’ (Decapitation) వ్యూహం అంతర్జాతీయ రాజకీయాల్లో సంచలనం సృష్టిస్తోంది.
వరుస దాడులు: జనవరిలో వెనిజులా అధ్యక్షుడు నికోలస్ మదురోను, ఆయన భార్యను అమెరికా దళాలు ఆ దేశంలోకి చొరబడి అరెస్ట్ చేసి అమెరికా జైలుకు తరలించాయి. ఇప్పుడు ఫిబ్రవరి చివరిలో ఇరాన్ నేత ఖమేనీని అంతం చేశాయి.
ఏమిటీ ‘డెకాపిటేషన్’ వ్యూహం?: దీనిని తెలుగులో “శిరచ్ఛేదం” అని అనవచ్చు. అంటే ఒక దేశంతో పూర్తిస్థాయి యుద్ధం చేయడం కంటే, ఆ దేశానికి ‘మెదడు’ లాంటి కీలక నాయకుడిని లక్ష్యంగా చేసుకుని హతమార్చడం లేదా బంధించడం. దీనివల్ల ఆ దేశ సైన్యం నియంత్రణ కోల్పోతుంది. గతంలో సద్దాం హుస్సేన్, గడ్డాఫీ విషయంలోనూ అమెరికా ఇదే పనిచేసింది.
కిమ్ జోంగ్ ఉన్ స్పందన: సోషల్ మీడియాలో కిమ్ జోంగ్ ఉన్‌పై మీమ్స్ వెల్లువెత్తుతున్నాయి. “నా వైపు ఏదైనా క్షిపణి వస్తే అణుబాంబు వేస్తాను” అని కిమ్ అంటున్నట్లు నెటిజన్లు కామెంట్స్ చేస్తున్నారు. అయితే, అమెరికా చర్యలతో ఉత్తర కొరియాలో అంతర్గతంగా భయం మొదలైందని విశ్లేషకులు చెబుతున్నారు.
ట్రంప్ పట్టుదల: ప్రపంచంలోనే అత్యంత శక్తివంతమైన నాయకుడిగా ఎదగాలనే పట్టుదలతో ట్రంప్ ఉన్నారని, తనకు లొంగని దేశాధినేతలను ఈ వ్యూహంతో దెబ్బతీస్తున్నారని రాజకీయ విశ్లేషకుడు రాబర్ట్ పేజ్ పేర్కొన్నారు.