చెన్నై: తమిళనాడులోని తంజావూరు జిల్లాలో దారుణం జరిగింది. తన కూతురిని అతి దారుణంగా చంపిన వ్యక్తి బెయిల్పై బయటకు రాగానే, యువతి తండ్రి మరియు బంధువులు కలిసి అతడిని ఇంటికి వెళ్లి వేటకొడవళ్లతో నరికి చంపారు.
అసలేం జరిగిందంటే? ముప్పై ఏళ్ల అజిత్ కుమార్ అనే వ్యక్తి, పుణ్యమూర్తి కుమార్తె కావ్య (టీచర్గా పనిచేసేది) గత కొంతకాలంగా ప్రేమించుకుంటున్నారు. అయితే వీరి ప్రేమను కావ్య ఇంట్లో వారు తీవ్రంగా వ్యతిరేకించారు. అంతేకాకుండా, కావ్యకు మరో వ్యక్తితో వివాహం నిశ్చయం చేశారు. దీనితో ఆగ్రహించిన అజిత్ కుమార్, గత ఏడాది నవంబర్ 27న పాఠశాలకు వెళ్తున్న కావ్యను దారిలో అడ్డగించి దారుణంగా నరికి చంపాడు.
ప్రతీకారం తీర్చుకున్న తండ్రి: కూతురి హత్య కేసులో అరెస్టయిన అజిత్ కుమార్కు గత నెలలో కోర్టు బెయిల్ మంజూరు చేసింది. జైలు నుండి బయటకు వచ్చిన అజిత్పై కక్ష పెంచుకున్న కావ్య తండ్రి పుణ్యమూర్తి, తన బంధువులతో కలిసి పథకం వేశాడు. శుక్రవారం తెల్లవారుజామున రెండు గంటల ప్రాంతంలో అజిత్ కుమార్ ఇంటికి వెళ్లిన ఈ బృందం, నిద్రపోతున్న అతడిని విచక్షణారహితంగా నరికి చంపింది.
పోలీస్ స్టేషన్లో లొంగుబాటు: తంజావూరు జిల్లా మేలక్కాలకుడిలో జరిగిన ఈ ఘోరకలియం తర్వాత, నిందితులు నేరుగా అమ్మపేటై పోలీస్ స్టేషన్కు వెళ్లి లొంగిపోయారు. ఈ కేసులో పుణ్యమూర్తి (53), లోకేష్ (22), రామలింగం (30), కరుప్పయ్య (55)లను పోలీసులు అరెస్ట్ చేశారు. మృతుడు అజిత్ కుమార్ మృతదేహాన్ని పోస్టుమార్టం నిమిత్తం తంజావూరు మెడికల్ కాలేజ్ ఆసుపత్రికి తరలించారు.