కేవలం అవమానకరమైన భాషను ఉపయోగించడం వల్ల అది ఎస్సీ, ఎస్టీ (అత్యాచార నిరోధక) చట్టం, 1989 కింద నేరం కాదని సుప్రీంకోర్టు స్పష్టం చేసింది. ఒక వ్యక్తిని అతని కులం ఆధారంగా అవమానించాలనే ఉద్దేశంతో ఆ భాషను వాడనంత వరకు దానిని ఈ చట్టం కింద నేరంగా పరిగణించలేమని కోర్టు పేర్కొంది.
జస్టిస్ జె.బి. పార్దీవాలా మరియు జస్టిస్ అలోక్ అరాధేలతో కూడిన ధర్మాసనం గత వారం వెలువరించిన తీర్పులో ఒక వ్యక్తిపై ఉన్న క్రిమినల్ చర్యలను రద్దు చేస్తూ ఈ వ్యాఖ్యలు చేసింది. కేశవ్ మహతో అలియాస్ కేశవ్ కుమార్ మహతో అనే వ్యక్తి పాట్నా హైకోర్టు తీర్పును సవాలు చేస్తూ దాఖలు చేసిన పిటిషన్‌పై ధర్మాసనం విచారణ చేపట్టింది. ఈ కేసులో ఎఫ్.ఐ.ఆర్ (FIR)లో గానీ, ఛార్జ్‌షీట్‌లో గానీ సదరు వ్యక్తిని కులం పేరుతో దూషించినట్లు లేదా బెదిరించినట్లు ఎక్కడా ఆధారాలు లేవని, అయినా దిగువ కోర్టు మరియు హైకోర్టు ఈ కేసును కొనసాగించడం తప్పు అని ధర్మాసనం అభిప్రాయపడింది.
చట్టం ఏం చెబుతోంది? ఎస్సీ, ఎస్టీ చట్టంలోని సెక్షన్ 3(1) ప్రకారం.. ఎస్సీ లేదా ఎస్టీ వర్గానికి చెందని వ్యక్తి, ఉద్దేశపూర్వకంగా ఆ వర్గానికి చెందిన వారిని బహిరంగ ప్రదేశంలో కులం పేరుతో దూషించినా, అవమానించాలనే ఉద్దేశంతో బెదిరించినా అది శిక్షార్హమైన నేరం.
రెండు ముఖ్యమైన షరతులు: సుప్రీంకోర్టు పాత తీర్పులను ఉటంకిస్తూ, సెక్షన్ 3(1)(r) కింద ఒక వ్యక్తిని దోషిగా నిర్ధారించడానికి రెండు షరతులు పూర్తి కావాలని పేర్కొంది:
- ఫిర్యాదుదారుడు ఖచ్చితంగా ఎస్సీ లేదా ఎస్టీ వర్గానికి చెందిన వ్యక్తి అయి ఉండాలి.
- ఎదుటి వ్యక్తి చేసిన అవమానం లేదా బెదిరింపు.. ఫిర్యాదుదారుడు సదరు వర్గానికి చెందినవాడనే కారణంతోనే జరిగి ఉండాలి.
కేవలం ఫిర్యాదుదారుడు ఎస్సీ/ఎస్టీ వర్గానికి చెందినవాడైనంత మాత్రాన, జరిగిన ప్రతి గొడవను ఈ చట్టం కిందకు తీసుకురాలేమని, అవమానించాలనే స్పష్టమైన ‘ఉద్దేశం’ (Intent) ఉండాలని పేర్కొంటూ అప్పీల్ దారుడిపై ఉన్న కేసును కోర్టు రద్దు చేసింది.