విదేశీ పర్యటనకు వెళ్లాలనుకునే భారతీయులకు వీసా కోసం వేచి చూడాలి, క్యూలో నిలబడాలి అనే చింత ఇక అవసరం లేదు. ఎందుకంటే మీరు ఊహించిన దానికంటే చాలా సులభంగా, వేగంగా విదేశాలకు వెళ్లవచ్చు. ప్రపంచంలోని అనేక దేశాలు భారతీయులకు వీసా లేకుండానే తమ దేశాన్ని సందర్శించేందుకు అనుమతినిస్తున్నాయి. ఆ దేశాల వివరాలు ఇక్కడ ఉన్నాయి:
మలేషియా: భారతీయులు మలేషియాను వీసా లేకుండా సందర్శించవచ్చు. అయితే ప్రయాణికులు అక్కడికి చేరుకోవడానికి ముందే ‘మలేషియా డిజిటల్ అరైవల్ కార్డ్’ (MDAC) సమర్పించాలి. విమాన ఛార్జీలు సుమారు రూ. 15,000 నుండి రూ. 22,000 వరకు ఉంటాయి. నవంబర్ మరియు డిసెంబర్ నెలలు ఇక్కడ పర్యటించడానికి ఉత్తమ సమయం.
మాల్దీవులు: భారతీయులు వీసా లేకుండా సందర్శించే దేశాల్లో మాల్దీవులు ఒకటి. ప్రయాణానికి ముందు ‘IMUGA’ పోర్టల్‌లో ట్రావెల్ డిక్లరేషన్ సమర్పించడం తప్పనిసరి. విమాన ఛార్జీలు సుమారు రూ. 20,000 వరకు ఉంటాయి. నవంబర్ నుండి ఏప్రిల్ మధ్య కాలం ఇక్కడ పర్యటించడానికి అనువైన సమయం.
శ్రీలంక: ప్రకృతి అందాలకు నిలయమైన శ్రీలంకలో నైరుతి తీరాన్ని డిసెంబర్-మార్చి మధ్య, తూర్పు తీరాన్ని ఏప్రిల్-నవంబర్ మధ్య సందర్శించడం ఉత్తమం. ఇక్కడికి వెళ్లి రావడానికి విమాన ఛార్జీలు రూ. 20,000 లోపే ఉంటాయి.
మారిషస్: భారతీయులు వీసా లేకుండా 90 రోజుల వరకు మారిషస్‌లో ఉండవచ్చు. మే నుండి డిసెంబర్ వరకు ఇక్కడ పర్యటించడానికి సరైన సమయం. రిటర్న్ విమాన ఛార్జీలు సుమారు రూ. 45,000 వరకు ఉండవచ్చు.
కజకిస్తాన్: కజకిస్తాన్ లో భారతీయులు 14 రోజుల వరకు వీసా లేకుండా ఉండవచ్చు. ఏప్రిల్-మే మరియు సెప్టెంబర్-అక్టోబర్ నెలలు పర్యటనకు అనుకూలం. విమాన ఛార్జీలు రూ. 20,000 నుండి రూ. 40,000 వరకు ఉండవచ్చు. ఇవే కాకుండా హాంగ్ కాంగ్, ఫిలిప్పీన్స్ వంటి దేశాలు కూడా భారతీయులకు వీసా లేకుండా అనుమతినిస్తున్నాయి.