చైనాలోని హైస్పీడ్ రైలులో ఉన్న విలాసవంతమైన వసతులను చూపే ఒక వీడియో ప్రస్తుతం సోషల్ మీడియాలో అందరి దృష్టిని ఆకర్షిస్తోంది.
ఒక ట్రావెల్ వ్లాగర్ పంచుకున్న ఈ వీడియోలో, రైలులోని బిజినెస్ క్లాస్ కోచ్‌లో అందించే సదుపాయాలను చూపించారు.
ఈ ప్రయాణ అనుభవం రైల్వే స్టేషన్‌లోనే ప్రారంభమవుతుంది. బిజినెస్ క్లాస్ ప్రయాణికుల కోసం ప్రత్యేక వెయిటింగ్ రూమ్ ఉంటుందని, రైలు బయలుదేరే ముందు ఒక చిన్న అలర్ట్ డివైజ్ (పేజర్) ద్వారా సమాచారం అందిస్తారని ఆ వీడియోలో తెలిపారు. రైలు ఎక్కడానికి సాధారణ ప్రయాణికుల్లా పొడవైన క్యూలో నిలబడాల్సిన అవసరం కూడా లేదని చెప్పారు.
రైలు లోపల ఉన్న సీట్లు చాలా మందిని ఆశ్చర్యపరుస్తున్నాయి. వెడల్పుగా ఉండే ఈ సీట్లను వెనక్కి వంచి, పడుకుని విశ్రాంతి తీసుకునేలా బెడ్‌గా మార్చుకోవచ్చు. ప్రతి సీటు దగ్గర ప్రత్యేక టేబుల్ మరియు మొబైల్ ఫోన్ల కోసం వైర్‌లెస్ ఛార్జింగ్ సదుపాయం ఉందని తెలిపారు. చిన్న వస్తువులను పెట్టుకోవడానికి కూడా స్థలం కల్పించారు.
అంతేకాకుండా, బిజినెస్ క్లాస్ ప్రయాణికులకు ఉచితంగా స్నాక్స్, పానీయాలు అందిస్తారని, రైలులోని టాయిలెట్ చాలా శుభ్రంగా, సౌకర్యవంతంగా ఉందని ఆ ట్రావెల్ వ్లాగర్ తెలిపాడు. ఫేస్ వాష్, హ్యాండ్ క్రీమ్ లాంటి వస్తువులను కూడా అక్కడ ఉంచినట్లు చెప్పారు.
ఈ ప్రయాణానికి సుమారు ₹5,000 ఖర్చయినట్లు ఆ వీడియోలో తెలిపారు. సాధారణ సీట్ల కంటే ఈ బిజినెస్ క్లాస్ ఛార్జీలు ఎక్కువగా ఉన్నప్పటికీ, ఇందులో అదనపు స్థలం (Extra space), గోప్యత (Privacy), విశ్రాంతి తీసుకునే సదుపాయాలు లభిస్తాయి. చైనా హైస్పీడ్ రైల్వే సర్వీసులో ప్రయాణ వేగంతో పాటు, ప్రయాణికుల సౌకర్యానికి కూడా ఎంతటి ప్రాధాన్యత ఇస్తారో ఈ వీడియో స్పష్టం చేస్తోంది.
Leave a Reply