పటిక (Fitkari/Alum) ప్రతి ఇంట్లోనూ ఉంటుంది, కానీ దీని ఉపయోగాల గురించి చాలా తక్కువ మందికి తెలుసు. పూర్వకాలంలో పటికను ఇంటి పనుల్లో, ఆరోగ్య విషయాల్లో ఎక్కువగా వాడేవారు. నేటి ఆధునిక కాలంలో ఖరీదైన కాస్మెటిక్స్ ముందు పటిక ప్రాముఖ్యత తగ్గినప్పటికీ, దీని వల్ల కలిగే ప్రయోజనాలు మాత్రం అద్భుతం. ఆయుర్వేదం మరియు సాంప్రదాయ వైద్యంలో పటికకు ప్రత్యేక స్థానం ఉంది.
చర్మ సంరక్షణ నుండి గాయాలు మానడం వరకు పటిక ఎలా ఉపయోగపడుతుందో ఇక్కడ చూడండి:
1. మొటిమల నుండి ఉపశమనం
పటికలో యాంటీ బ్యాక్టీరియల్ గుణాలు పుష్కలంగా ఉంటాయి. ఇవి చర్మంపై అదనపు జిడ్డును తగ్గించి, బ్యాక్టీరియా పెరగకుండా చేస్తాయి. దీనివల్ల మొటిమలు, పింపుల్స్ త్వరగా తగ్గుతాయి.
- వాడే విధానం: పటికను నీటితో తడిపి ముఖంపై మెల్లగా రుద్దాలి. 1-2 నిమిషాల తర్వాత నీటితో కడిగేయాలి. వారానికి 2-3 సార్లు ఇలా చేస్తే మంచి ఫలితం ఉంటుంది.
2. గాయాలు మరియు రక్తస్రావం ఆపడానికి
షేవింగ్ చేసుకునేటప్పుడు గాట్లు పడినా లేదా వంటగదిలో చిన్నపాటి దెబ్బలు తగిలినా, తడి పటికను ఆ చోట రాస్తే వెంటనే రక్తస్రావం ఆగిపోతుంది. ఇందులోని యాంటీ సెప్టిక్ గుణాలు ఇన్ఫెక్షన్ రాకుండా చేస్తాయి.
3. నేచురల్ డియోడరెంట్‌గా..
చెమట వల్ల వచ్చే దుర్వాసనకు కారణమయ్యే బ్యాక్టీరియాలను పటిక ఖతం చేస్తుంది. స్నానం చేసిన తర్వాత చంకల భాగంలో తడి పటికను రుద్దితే, అది రోజంతా సహజమైన డియోడరెంట్‌లా పనిచేస్తుంది. ఇందులో రసాయనాలు ఉండవు కాబట్టి సున్నితమైన చర్మం ఉన్నవారికి ఇది చాలా సురక్షితం.
4. నోటి పూత (Mouth Ulcers)
నోటిలో పొక్కులు లేదా పూత వచ్చినప్పుడు పటిక నీటితో పుక్కిలిస్తే త్వరగా ఉపశమనం కలుగుతుంది. ఇది మంటను తగ్గించి గాయాలను మాన్పుతుంది.
- వాడే విధానం: కొంచెం పటిక పొడిని గోరువెచ్చని నీటిలో కలిపి రోజుకు ఒకసారి పుక్కిలించాలి.
5. నీటిని శుద్ధి చేయడానికి
పాతకాలం నుండి నీటిని శుభ్రం చేయడానికి పటికను వాడుతున్నారు. మురికి నీటిలో కొంచెం పటిక వేస్తే, అందులోని మలినాలన్నీ అడుగున చేరిపోయి నీరు తేటగా మారుతుంది. అయితే, పూర్తిగా బ్యాక్టీరియా పోవాలంటే నీటిని మరిగించడం తప్పనిసరి.
6. చర్మం బిగుతుగా (Skin Tightening) మారడానికి
పటిక చర్మ రంధ్రాలను (Pores) దగ్గరకు చేర్చి చర్మాన్ని టైట్ చేస్తుంది. ఇది ముఖంపై ముడతలను తగ్గించి యవ్వనంగా కనిపించేలా చేస్తుంది.
- వాడే విధానం: పటికను రోజ్ వాటర్‌లో కలిపి టోనర్‌లా ముఖానికి రాసుకుంటే ముఖం తాజాగా మారుతుంది.
7. పాదాల దుర్వాసన మరియు ఫంగల్ ఇన్ఫెక్షన్
పటికలో యాంటీ ఫంగల్ గుణాలు ఉన్నాయి. గోరువెచ్చని నీటిలో పటిక పొడి వేసి, అందులో పాదాలను 10-15 నిమిషాల పాటు ఉంచితే పాదాల దుర్వాసన మరియు ఇన్ఫెక్షన్లు తగ్గుతాయి.