ఉధంపూర్ ప్రమాదం: జమ్మూ కాశ్మీర్లోని ఉధంపూర్ జిల్లా రామ్నగర్ ప్రాంతంలోని ఖగోతే వద్ద ఒక ప్రయాణీకుల బస్సు ప్రమాదానికి గురైంది. ఈ ప్రమాదంలో 7 మంది మరణించగా, మరికొంతమంది గాయపడినట్లు సమాచారం.
ప్రమాదం జరిగిన వెంటనే సహాయక చర్యలు ముమ్మరంగా ప్రారంభమయ్యాయి. స్థానిక యంత్రాంగం మరియు సహాయక బృందాలు బాధితులను వెలికితీసే పనిలో నిమగ్నమయ్యాయి. గాయపడిన వారిని సమీపంలోని ఆసుపత్రులకు తరలిస్తున్నారు. ప్రమాదానికి గల కారణాలు మరియు బాధితుల సంఖ్యపై మరిన్ని వివరాలు తెలియాల్సి ఉంది.
ఈ ప్రమాదంపై కేంద్ర మంత్రి జితేంద్ర సింగ్ ‘ఎక్స్’ (ట్విట్టర్) వేదికగా స్పందిస్తూ.. “ఇప్పుడే ఉధంపూర్ డిసి శ్రీ మింగా షెర్పాతో మాట్లాడాను. గంట క్రితమే కనోట్ గ్రామంలో ఒక విషాదకరమైన రోడ్డు ప్రమాదం జరిగినట్లు తెలిసింది. రామ్నగర్ నుండి ఉధంపూర్ వెళ్తున్న ఒక పబ్లిక్ ట్రాన్స్పోర్ట్ బస్సు ఈ ప్రమాదానికి గురైంది” అని పేర్కొన్నారు.
కొనసాగుతున్న రెస్క్యూ ఆపరేషన్ సహాయక చర్యలు వెంటనే ప్రారంభమయ్యాయని, ఈ ప్రమాదంలో భారీగా ప్రాణనష్టం జరిగే అవకాశం ఉందని ఆయన తెలిపారు. బాధితులకు అన్ని విధాలా సహాయం అందిస్తున్నామని, తీవ్రంగా గాయపడిన వారిని మెరుగైన చికిత్స కోసం ఎయిర్లిఫ్ట్ (హెలికాప్టర్ ద్వారా తరలింపు) చేసేందుకు ఏర్పాట్లు చేస్తున్నట్లు వివరించారు.
ఉధంపూర్ జిల్లాలోని కొండ ప్రాంతాల గుండా వెళ్లే రామ్నగర్ మార్గంలో రోడ్ల దుస్థితి మరియు మారుతున్న వాతావరణం కారణంగా తరచుగా ప్రమాదాలు జరుగుతుంటాయి. మలుపులు మరియు ఇరుకైన రహదారుల వల్ల ఇక్కడ వాహనాలు నడపడం చాలా ప్రమాదకరం. తాజా ప్రమాదం నేపథ్యంలో సహాయక చర్యలకు ఆటంకం కలగకుండా పోలీసులు ట్రాఫిక్ను మళ్లించారు.