కొండల నుండి సెలయేళ్ల వరకు.. కనువిందు చేసే సౌందర్యం.. కేరళలో ఉన్న ఈ ప్రదేశం గురించి ఇంకా చాలామందికి ఎందుకు తెలియలేదు.? వెళ్తే మాత్రం తిరిగి రావాలనిపింంచదు.!

కేరళ అనగానే మున్నార్, వాగమొన్ వంటి ప్రముఖ పర్యాటక ప్రాంతాలే మొదట గుర్తుకొస్తాయి. అయితే, జనం రద్దీకి దూరంగా ప్రకృతి ప్రశాంతతను ఆస్వాదించాలనుకునే వారికి పతనంతిట్ట జిల్లాలో ఉన్న గవి (Gavi) పూర్తిగా విభిన్నమైన అనుభవాన్ని ఇస్తుంది.

కొండలు, లోయలు, దట్టమైన అడవులు, సెలయేళ్లు అని చుట్టూ పచ్చదనం పరిచేసి ఉన్న ఈ ప్రాంతం పెరియార్ టైగర్ రిజర్వ్‌తో ముడిపడి ఉన్న అటవీ ప్రాంతం.

గవికి వెళ్లే ప్రయాణమే ఒక ప్రత్యేకమైన అనుభూతిని ఇస్తుంది. మార్గమధ్యంలో దట్టమైన అడవులు, కొండ దారులు, జలాశయాలు, జలపాతాలు మరియు యాలకుల (ఏలక్కాయల) తోటలను దాటుకుంటూ వెళ్లవచ్చు. ప్రకృతిని దగ్గరగా ఆస్వాదించాలనుకునే వారికి బోటింగ్, ట్రెకింగ్ , జంగిల్ సఫారీ మరియు క్యాంపింగ్ వంటి అనుభవాలు కూడా లభిస్తాయి.

గవి ప్రాంతం ప్రకృతి సంపదకే కాకుండా వన్యప్రాణులకు కూడా పేరుగాంచింది. ఏనుగులు, అడవి దున్నలు , జింకలు, నీలగిరి లంగూర్లు సహా వివిధ రకాల జంతువులతో పాటు అనేక పక్షులను కూడా ఈ ప్రాంతంలో చూడవచ్చు. బర్డ్ వాచింగ్ (పక్షులను తిలకించడం) ఇష్టపడేవారికి గవి అద్భుతమైన ప్రదేశమని కేరళ పర్యాటక శాఖ పేర్కొంటోంది. చెక్క కుటీరాలు , గుడారాలలో (టెంట్స్) బస చేసే వసతులు కూడా ఉండటంతో, నగర జీవితానికి దూరంగా అడవి వాతావరణాన్ని ఆస్వాదించవచ్చు.

అదే సమయంలో, ఇది సంరక్షిత అటవీ ప్రాంతంతో ముడిపడి ఉన్న పర్యాటక ప్రాంతం కాబట్టి పర్యాటకులకు కొన్ని నిబంధనలు కూడా ఉన్నాయి. నిర్ణీత ప్రాంతాల్లో మాత్రమే వాహనాలను నిలపాలి; అటవీ ప్రాంతంలో చెత్త వేయడం వంటి పనులను నివారించాలి. ప్రకృతికి, వన్యప్రాణులకు హాని కలగకుండా ప్రయాణించడమే గవి అందాన్ని దీర్ఘకాలం కాపాడటానికి దోహదపడుతుంది.