ఉత్తరప్రదేశ్: బంధాలకు, అనుబంధాలకు ఉన్న పవిత్రతను ప్రశ్నార్థకం చేసేలా ఒక షాకింగ్ ఘటన వెలుగులోకి వచ్చింది. 55 ఏళ్ల వ్యక్తి తన సొంత కొడుకు కాబోయే భార్యతో (కోడలు) వివాహేతర సంబంధం పెట్టుకుని, చివరికి ఆమెను పెళ్లాడటం స్థానికంగా తీవ్ర సంచలనం రేపింది.
ఈ ఘటన అప్పట్లో కుటుంబంలో, సమాజంలో పెద్ద దుమారమే రేపింది. ఆ జంట వివాహం తర్వాత గ్రామానికి తిరిగి రాగానే, గ్రామ పంచాయతీ కఠినంగా స్పందించి వారిని గ్రామం నుండి వెలివేసింది. ప్రస్తుతం ఈ జంట వేరే ప్రాంతంలో ఉంటున్నప్పటికీ, వారి గురించి ఆ ప్రాంతమంతా ఇప్పటికీ చర్చించుకుంటున్నారు.
అసలేం జరిగింది? ఒక తండ్రి తన కొడుకు కోసం ఒక యువతిని సంబంధం చూసి వివాహం నిశ్చయించాడు. పెళ్లి తేదీ కూడా ఖరారైంది. ఈ క్రమంలో పెళ్లి సంబంధం కోసం ఆ యువతి ఇంటికి తండ్రి తరచూ వెళ్లాల్సి వచ్చేది. ఈ రాకపోకలే క్రమంగా వారిద్దరి మధ్య సాన్నిహిత్యానికి దారితీశాయి. ఎవరికీ తెలియకుండా సదరు తండ్రి, కాబోయే కోడలితో ప్రేమలో పడ్డాడు.
ఎనిమిది రోజుల క్రితం, సదరు వ్యక్తి “యువతి ఆరోగ్యం బాలేదు, డాక్టర్ దగ్గరకు తీసుకెళ్తాను” అని చెప్పి ఆమెను తనతో పాటు తీసుకెళ్లాడు. సాయంత్రం వరకు వారు తిరిగి రాకపోవడంతో అనుమానం వచ్చిన కుటుంబ సభ్యులు నిలదీయగా, ముందుగా దాటవేసినా.. చివరికి తాము పెళ్లి చేసుకున్నామని ఆ తండ్రి బాంబు పేల్చాడు. ఈ వార్త విన్న రెండు కుటుంబాలు షాక్కు గురయ్యాయి.
గ్రామంలో పెద్ద రచ్చ: ఆ జంట గ్రామానికి తిరిగి రాగానే కొడుకు తీవ్ర ఆగ్రహంతో తండ్రిపై దాడికి దిగాడు. అటు ఇంట్లో ఉన్న భార్య కూడా ఆ యువతితో గొడవకు దిగింది. పరిస్థితి విషమించడంతో గ్రామస్థులు జోక్యం చేసుకుని సర్దిచెప్పారు. అనంతరం జరిగిన పంచాయతీలో, కొడుకు మరియు అతని తల్లి కోరిక మేరకు ఆ వ్యక్తిని, అతని కొత్త భార్యను గ్రామం నుండి వెలివేశారు.
ఆర్థిక ఇబ్బందుల వల్ల అమ్మాయి కుటుంబం పెద్దగా వ్యతిరేకించలేదు కానీ, సమాజంలో మాత్రం ఈ ఘటన తీవ్ర విమర్శలకు దారితీసింది. కొడుకు కాబోయే భార్యను తండ్రే వివాహం చేసుకోవడం ఏమిటని స్థానికులు విస్తుబోతున్నారు. ఇటువంటి ఘటనలు కుటుంబ విలువలని ఎలా దెబ్బతీస్తాయో ఈ ఉదంతం నిదర్శనంగా నిలిచింది. ఈ వార్త సోషల్ మీడియాలో కూడా పెద్ద ఎత్తున చర్చకు దారితీసింది.