ఉత్తరప్రదేశ్‌లోని కాన్పూర్‌లో బీజేపీ నేత ఫామ్‌హౌస్‌లో దోపిడీ ఘటన కలకలం రేపింది. కొత్తగా పార్టీ పదవి చేపట్టి తిరిగి వచ్చిన నేతను దుండగులు చేతులు, కాళ్లు కట్టేసి బాత్‌రూమ్‌లో బంధించారు. అనంతరం రూ.12 లక్షల నగదు, బంగారు ఆభరణాలను దోచుకుని పరారైనట్లు సమాచారం.
కొత్త పదవి చేపట్టి వచ్చిన రోజుల్లోనే దోపిడీ!
బీజేపీ వెనుకబడిన వర్గాల విభాగంలో రాష్ట్ర స్థాయి కార్యదర్శిగా నియమితులైన రమేశ్ యాదవ్‌కు చెందిన ఫామ్‌హౌస్‌లో ఈ ఘటన జరిగినట్లు కథనం పేర్కొంది. అక్టోబర్ 1న కొత్త బాధ్యతలు స్వీకరించేందుకు ఆయన లక్నోకు వెళ్లారు. సోమవారం రాత్రి ఆలస్యంగా తిరిగి వచ్చి, అర్ధరాత్రి సమయంలో ఫామ్‌హౌస్‌లో ఒంటరిగా ఉన్నట్లు సమాచారం.
ఆ సమయంలో ముఖాలకు ముసుగులు ధరించిన కొందరు దుండగులు ఫామ్‌హౌస్‌లోకి చొరబడ్డారు. రమేశ్ యాదవ్ చేతులు, కాళ్లు కట్టేసి బాత్‌రూమ్‌లో బంధించినట్లు ఆరోపణలు ఉన్నాయి. అనంతరం అక్కడ ఉన్న రూ.12 లక్షల నగదు, బంగారు కడియం, గొలుసును తీసుకుని పరారైనట్లు తెలుస్తోంది.
సీసీటీవీ దృశ్యాల ఆధారంగా దర్యాప్తు!
ఈ ఘటనపై అర్ధరాత్రి దాటిన తర్వాత పోలీసులకు సమాచారం అందింది. దీంతో ఉన్నతాధికారులు సంఘటనా స్థలానికి చేరుకుని విచారణ చేపట్టారు. ఫామ్‌హౌస్‌లోని సీసీటీవీ దృశ్యాలను పరిశీలించినట్లు సమాచారం. దుండగులు లోపలికి వచ్చిన దృశ్యాలు స్పష్టంగా లభించకపోయినా, నల్లటి దుస్తులు ధరించిన ఇద్దరు అనుమానితులు అక్కడి నుంచి వెళ్లిన దృశ్యాలు రికార్డైనట్లు కథనం తెలిపింది.
ఈ కేసులో ఇద్దరిని అదుపులోకి తీసుకుని పోలీసులు విచారిస్తున్నట్లు సమాచారం. ఫామ్‌హౌస్‌లో భద్రతా సిబ్బంది ఉన్నప్పటికీ దోపిడీ ఎలా జరిగింది? నిందితులు లోపలికి ఎలా ప్రవేశించారు? అనే కోణాల్లో దర్యాప్తు కొనసాగుతోంది.
దోపిడీకి గురైన నగదు, బంగారు ఆభరణాలను స్వాధీనం చేసుకోవడంతో పాటు, ఈ ఘటనలో పాల్గొన్న వారిని గుర్తించేందుకు పోలీసులు ప్రయత్నిస్తున్నారు. బీజేపీ నేతకు చెందిన ఫామ్‌హౌస్‌లో జరిగిన ఈ ఘటన స్థానికంగా చర్చనీయాంశంగా మారింది.
Leave a Reply