కోల్‌కతా విమానాశ్రయంలో ఒక విమానానికి పక్షి ఢీకొనడంతో (Bird Hit) పెను ప్రమాదం తప్పింది. పైలట్ చాకచక్యంగా వ్యవహరించడంతో విమానంలోని 180 మంది ప్రయాణికులు సురక్షితంగా బయటపడ్డారు.
అసలేం జరిగింది?
మంగళవారం నాడు హైదరాబాద్ నుండి 180 మంది ప్రయాణికులతో ఇండిగో విమానం రాంచీకి బయలుదేరింది. అయితే రాంచీలో వాతావరణం అనుకూలించకపోవడం, దృశ్యమానత (Visibility) తక్కువగా ఉండటంతో విమానాన్ని కోల్‌కతాకు మళ్లించి అక్కడ ల్యాండ్ చేశారు.
రాంచీలో వాతావరణం చక్కబడిన తర్వాత, విమానం తిరిగి కోల్‌కతా నుండి బయలుదేరింది. అయితే టేకాఫ్ అయిన కొద్దిసేపటికే ఆకాశంలో ఒక పక్షి విమానం ముందు భాగాన్ని (Nose) బలంగా ఢీకొట్టింది.
పైలట్ సాహసం:
విమానం ముందు భాగంలో ఉండే రాడార్ పక్షి దెబ్బకు దెబ్బతిన్నట్లు పైలట్ గుర్తించారు. వెంటనే ఏటీసీ (ATC)ని సంప్రదించి, విమానాన్ని తిరిగి కోల్‌కతా విమానాశ్రయంలో సురక్షితంగా ల్యాండ్ చేశారు. దీంతో పెను ప్రమాదం తప్పిందని అధికారులు తెలిపారు.
తర్వాత ఇంజనీర్లు విమానాన్ని పరిశీలించి రిపేర్ చేయడానికి ప్రయత్నించారు. అయితే అది వెంటనే సాధ్యం కాకపోవడంతో, ప్రయాణికులను మరో విమానంలో రాంచీకి పంపించారు. దెబ్బతిన్న ఇండిగో విమానాన్ని మరమ్మతుల కోసం హ్యాంగర్‌కు తరలించారు.